തിരുവനന്തപുരം: നിലയ്ക്കാമുക്കിനും സമീപത്ത് തെരുവുനായ കുറുകെ ചാടിയതിനെ തുടര്‍ന്ന് നിയന്ത്രണം വിട്ട ഓട്ടോറിക്ഷ മറിഞ്ഞ് പത്ത് വയസ്സുകാരന്‍ മരിച്ചു. കടയ്ക്കാവൂര്‍ നിലയ്ക്കാമുക്കിനടുത്ത് ബുധനാഴ്ച വൈകിട്ട് മൂന്നരയോടെയായിരുന്നു അപകടം. അഞ്ചുതെങ്ങ് മാമ്പള്ളി നല്ലാംതിട്ട സ്വദേശികളായ വാള്‍ട്ടര്‍ ബിജി ദമ്പതികളുടെ മകന്‍ ബിനോയ് ആണ് മരിച്ചത്.

അമ്മ ബിജിക്കും സഹോദരി ബ്ലസിക്കുമൊപ്പം യാത്ര ചെയ്യുകയായിരുന്നു ബിനോയ്. നിലയ്ക്കാമുക്ക് ചന്തയ്ക്ക് സമീപം വച്ച് തെരുവുനായ ഓട്ടോയ്ക്ക് കുറുകെ ചാടുകയും പെട്ടെന്ന് ബ്രേക്ക് ഇട്ടപ്പോള്‍ നിയന്ത്രണം നഷ്ടമായ ഓട്ടോ ഫുട്പാത്തിലേക്ക് ഇടിച്ചുകയറി മറിയുകയുമായിരുന്നു. ഓട്ടോയ്ക്കടിയില്‍പ്പെട്ട ബിനോയിയെ ഉടന്‍ തന്നെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.

അപകടത്തില്‍ ബിജിക്കും ബ്ലസിക്കും ഓട്ടോ ഡ്രൈവര്‍ക്കും പരിക്കേറ്റു. അഞ്ചുതെങ്ങ് സെന്റ് ജോസഫ് ഹയര്‍സെക്കന്‍ഡറി സ്‌കൂളിലെ അഞ്ചാം ക്ലാസ് വിദ്യാര്‍ത്ഥിയാണ് മരിച്ച ബിനോയ്.

A tragic accident in Kadakkavoor claimed the life of a 10-year-old boy after the auto-rickshaw he was traveling in overturned while trying to avoid a stray dog.