പുത്തനത്താണി: എഫ്.എമ്മിലെ പാട്ടും പ്രകൃതിഭംഗിയുമൊക്കെ ആസ്വദിച്ചങ്ങനെ ഇരിക്കാമെന്നല്ലാതെ തിരൂര്‍ മണ്ഡലത്തിലെ ചില ബസ് സ്റ്റോപ്പുകളില്‍ ബസുകള്‍ നിര്‍ത്തിത്തരുമെന്ന പ്രതീക്ഷ വേണ്ട. വേണമെങ്കില്‍ പത്തോ പതിനഞ്ചോ മീറ്റര്‍ അപ്പുറത്തു നിര്‍ത്തുമെന്നല്ലാതെ ഈ ന്യൂജനറേഷന്‍ ബസ് സ്റ്റോപ്പുകള്‍ ബസ് ജീവനക്കാര്‍ക്കു പിടിക്കുന്നില്ല. മണ്ഡലത്തിലെ ദേശീയപാതയോരങ്ങളായ വെട്ടിച്ചിറ, അതിരുമട എന്നിവിടങ്ങളിലാണ് ബസ് സ്റ്റോപ്പുകള്‍ നോക്കുകുത്തികളാകുന്നത്.
ഈ കാത്തിരിപ്പു കേന്ദ്രങ്ങള്‍ക്കു മുന്നില്‍ നിര്‍ത്തി ആളെയിറക്കാനോ കയറ്റാനോ ബസുകള്‍ ശ്രമിക്കുന്നില്ല. സി. മമ്മൂട്ടി എം.എല്‍.എയുടെ ഫണ്ടുപയോഗിച്ചു നിര്‍മിച്ചതാണിവ. ഇത്തരത്തില്‍ മണ്ഡലത്തില്‍ വിവിധ ഭാഗങ്ങളിലായി നിരവധി ബസ് കാത്തിരിപ്പു കേന്ദ്രങ്ങള്‍ നിര്‍മിച്ചിട്ടുണ്ട്. എന്നാല്‍, വെട്ടിച്ചിറയും അതിരുമടയും മാത്രം ബസുകള്‍ നിര്‍ത്തുന്നില്ലെന്നാണ് നാട്ടുകാരുടെ പരാതി.