തിരുവനന്തപുരം: ഓണം വാരാഘോഷയാത്രയില്‍ ശൗചാലയങ്ങളുടെ പ്രാധാന്യവുമായി ശുചിത്വ മിഷന്റെ ഫ്‌ളോട്ടൊരുങ്ങി.

സ്വാതന്ത്രത്തേക്കാള്‍ പ്രാധാന്യമര്‍ഹിക്കുന്നതാണ് ശുചിത്വമെന്ന രാഷ്ട്രപിതാവിന്റെ ആഹ്വാനത്തിന്റെ ഗൗരവം ജനങ്ങളെ ബോധ്യപ്പെടുത്താന്‍ ഉതകുന്ന വിധത്തില്‍ ശൗചാലയത്തിന്റെയും ശുചിത്വത്തിന്റെയും മാതൃകകള്‍ പ്രദര്‍ശിപ്പിച്ച് അവയുടെ നിര്‍മാണം, ഉപയോഗം, പരിപാലനം എന്നിവ പ്രോത്സാഹിപ്പിക്കുവാന്‍ ലക്ഷ്യമിട്ടുള്ളതാണ് ശുചിത്വ മിഷന്റെ ഫ്‌ളോട്ട്. സാമൂഹിക സാമ്പത്തിക ഉന്നമനത്തിനും ആരോഗ്യത്തിനും പ്രവര്‍ത്തനക്ഷമതയ്ക്കും കുട്ടികളുടെ ക്ഷേമത്തിനും പരിസ്ഥിതി ജലസ്രോതസ്സുകളുടെ സംരക്ഷണത്തിനുമെല്ലാം ശൗചാലയങ്ങളുടെ ഉപയോഗം നിര്‍ണായകമാണ്. ഇതിന് ഏറ്റവും വലിയ തെളിവ് നമ്മുടെ നാട് തന്നെയാണ്. കേരളത്തിന്റെ ആരോഗ്യ-ക്ഷേമ രംഗത്തെ ഉയര്‍ന്ന സ്ഥാനവും നമ്മുടെ 97 ശതമാനം കുടുംബങ്ങളുടെ ശൗചാലയ ഉപയോഗവും തമ്മില്‍ അഭേദ്യ ബന്ധമാണുള്ളത്. രാജ്യത്തിനു തന്നെ മാതൃകയായ ഈ നേട്ടത്തിന് പൂര്‍ണത കൈവരിക്കുക എന്ന ലക്ഷ്യത്തിലേക്ക് നാം അതിവേഗം കുതിക്കുമ്പോള്‍ നമ്മുടെ ഉത്സവാഘോഷങ്ങളോടൊപ്പം ഈ നേട്ടവും വിളംബരം ചെയ്യുക എന്നതാണ് ശുചിത്വ മിഷന്റെ ലക്ഷ്യം. ഇതിന്റെ ഭാഗമായാണ് ശൗചാലയങ്ങളുടെ പ്രാധാന്യം അറിയിക്കുന്ന ഫ്‌ളോട്ടുമായി ഓണം വാരാഘോഷ യാത്രയില്‍ ശുചിത്വ മിഷന്‍ അണിനിരക്കുന്നത്. 97.3 ശതമാനം വീടുകള്‍ക്കും ടോയ്‌ലെറ്റ് സൗകര്യം ഉറപ്പാക്കിയിട്ടുള്ള നമ്മുടെ സംസ്ഥാനം, എല്ലാ വീട്ടിലും ശൗചാലയം ഉറപ്പാക്കിയ ജനസാന്ദ്രതയേറിയ ആദ്യ സംസ്ഥാനമെന്ന പദവിയിലേക്ക് അടുക്കുകയാണ്. നവംബര്‍ ഒന്നിന് ഈ ലക്ഷ്യം പൂര്‍ത്തിയാക്കും. ഇതിനായി രണ്ട് ലക്ഷത്തോളം ശൗചാലയങ്ങളുടെ നിര്‍മാണം സംസ്ഥാനത്തിന്റെ വിവിധ ഭാഗങ്ങളിലായി അതിവേഗം പുരോഗമിക്കുകയാണ്.
രാജ്യത്ത് ശൗചാലയ സൗകര്യമുള്ള വീടുകളുടെ സാന്ദ്രത 60 ശതമാനത്തില്‍ താഴെ നില്‍ക്കുമ്പോഴാണ് നാം ഈ നേട്ടം കൈവരിക്കുന്നതെന്നതാണ് നവംബര്‍ ഒന്നിന്റെ പ്രത്യേകത വര്‍ധിപ്പിക്കുന്നത്.