മക്ക: ഈ വർഷത്തെ ഹജ്ജ് വേളയിൽ ചരിത്രപ്രസിദ്ധമായ അറഫാ സംഗമത്തിന് നേതൃത്വം നൽകാൻ ശൈഖ് അലി അൽ ഹുദൈഫിയെ നിയമിച്ചു. ഇരു ഹറം കാര്യാലയ വകുപ്പാണ് മദീനയിലെ പ്രവാചക പള്ളിയുടെ ഇമാമും പ്രഭാഷകനുമായ ശൈഖ് അലി അൽ ഹുദൈഫിയെ നമിറ പള്ളിയിൽ നടക്കുന്ന അറഫ ദിന പ്രഭാഷകനായി നിയമിച്ചത്. 

സഊദി അറേബ്യയിലെയും ഇസ്‌ലാമിക ലോകത്തിലെയും ഏറ്റവും മികച്ച പാരായണക്കാരിൽ ഒരാളായി ഹുദൈഫി കണക്കാക്കപ്പെടുന്നു. രാജ്യത്തിനകത്തും പുറത്തുമുള്ള നിരവധി റേഡിയോ സ്റ്റേഷനുകളിൽ അദ്ദേഹത്തിന് റേഡിയോ റെക്കോർഡിങ്ങുകളുണ്ട്.

1972ൽ ഇമാം മുഹമ്മദ് ബിൻ സഊദ് ഇസ്‌ലാമിക് യൂനിവേഴ്സിറ്റിയിൽ നിന്ന് നിയമത്തിൽ ബിരുദവും 1975ൽ അൽ അസ്ഹർ യൂനിവേഴ്സിറ്റിയിൽ നിന്ന് ഇസ്‌ലാമിക നിയമത്തിൽ ബിരുദാനന്തര ബിരുദവും പിന്നീട് ഇതേ യൂനിവേഴ്സിറ്റിയിൽ നിന്ന് ഡോക്ടറേറ്റും നേടിയ ഹുദൈഫി 1979ൽ മദീനയിലെ മസ്ജിദുന്നബവിയിൽ ഇമാമായി.