ഭോപ്പാല്‍: കേന്ദ്ര ആരോഗ്യമന്ത്രി ജെ.പി നഡ്ഡയ്ക്കു നേരെ വിദ്യാര്‍ഥികള്‍ മഷിയൊഴിച്ചു. ഭോപ്പാല്‍ എയിംസ് കാമ്പസില്‍ സന്ദര്‍ശനം നടത്തി മടങ്ങുന്നതിനിടെയാണ് സംഭവം.

എയിംസ് വിദ്യാര്‍ഥികളാണ് മന്ത്രിക്കു നേരെ മഷിപ്രയോഗം നടത്തിയത്. ആശുപത്രിയിലെ സൗകര്യങ്ങല്‍ വര്‍ധിപ്പിക്കണമെന്നാവശ്യപ്പെട്ട് വിദ്യാര്‍ഥികള്‍ സമരം ചെയ്തുവരികയായിരുന്നു.

ഭോപ്പാലില്‍ എയിംസ് ആരംഭിച്ചിട്ട് 13 വര്‍ഷം പിന്നിട്ടെങ്കിലും ഇപ്പോഴും വകുപ്പിലെ പകുതിയും പ്രവര്‍ത്തനക്ഷമമല്ലെന്ന് പ്രതിഷേധക്കാര്‍ ചൂണ്ടിക്കാട്ടി. സംഭവസ്ഥലത്തെത്തിയ മന്ത്രിയോട് തങ്ങളുടെ ആവശ്യങ്ങള്‍ കേള്‍ക്കണമെന്ന് ആവശ്യപ്പെട്ടെങ്കിലും ഇത് നിരസിച്ചതിനെ തുടര്‍ന്നാണ് പ്രതിഷേധക്കാര്‍ക്കിടയില്‍നിന്നു മഷിയേറുണ്ടായത്.

പൊലിസ് ബലം പ്രയോഗിച്ചാണ് സമരക്കാരെ പിന്തിരിപ്പിച്ചത്. പൊലിസ് ലാത്തിപ്രയോഗത്തില്‍ രണ്ടു വിദ്യാര്‍ഥികള്‍ക്ക് പരുക്കേറ്റു.