ജിദ്ദ: കേന്ദ്ര ഹജ്ജ് കമ്മിറ്റി മുഖേനയുള്ള ഇന്ത്യന്‍ ഹാജിമാരുടെ ആദ്യ സംഘം നാട്ടിലേക്ക് മടങ്ങി. ജിദ്ദ കിങ് അബ്ദുല്‍ അസീസ് വിമാനത്താവളത്തില്‍ നിന്ന് ഇന്നലെ ഡല്‍ഹിയിലേക്കായിരുന്നു മടക്കയാത്ര.  മദീന വഴിയാണ് ഇവര്‍ ഹജ്ജിനെത്തിയത്.  മലയാളികളടക്കം സ്വകാര്യ ഗ്രൂപ്പുകള്‍ മുഖേന വന്നവരുടെ മടക്കയാത്ര കഴിഞ്ഞ ദിവസം ആരംഭിച്ചിരുന്നു.
മക്കയില്‍ നിന്നും ഇന്നലെ രാവിലെ സഊദി മുത്വവഫിന്റെ പ്രത്യേക ബസുകളിലാണ് ഇവര്‍ എയര്‍പോര്‍ട്ടുകളിലേക്ക് പുറപ്പെട്ടത്. ഇന്ത്യന്‍  കോണ്‍സല്‍ ജനറല്‍ നൂര്‍ റഹ്മാന്‍ ശൈഖിന്റെ നേതൃത്വത്തിലുള്ള ഇന്ത്യന്‍ ഹജ്ജ് മിഷന്‍ സംഘത്തിലാണ്  ഇവരെ മക്കയില്‍ നിന്നും യാത്രയാക്കിയത്. തീര്‍ഥാടകര്‍ക്ക് വിതരണം ചെയ്യാനുള്ള സംസം  ഓരോ എംബാര്‍ക്കേഷന്‍ സെന്ററിലും എത്തിച്ചിട്ടുണ്ടെന്നും ഇന്ത്യന്‍ ഹജ്ജ് മിഷന്‍ അറിയിച്ചു. ഹജ്ജ് കമ്മിറ്റിക്ക് കീഴിലെ തീര്‍ഥാടകരില്‍ 52,734 പേര്‍ ജിദ്ദയില്‍ നിന്നും 47,170 പേര്‍ മദീന വഴിയും നാട്ടിലേക്ക് മടങ്ങും. മദീന വഴി ഹാജിമാരുടെ ആദ്യ സംഘം സെപ്റ്റംബര്‍ 29നാണ് മടങ്ങുക.
അതേസമയം ജിദ്ദ എയര്‍പോര്‍ട്ട് വഴി ഇന്നലെ വരെ രണ്ടു ലക്ഷത്തോളം ഹാജിമാര്‍ സ്വദേശങ്ങളിലേക്ക് തിരിച്ചു പോയതായി എയര്‍പോര്‍ട്ട് അതോറിറ്റി അറിയിച്ചു.