കൊച്ചി: ട്വന്റി20 പാര്‍ട്ടിക്കും തനിക്കും എതിരെ നടത്തിയ പ്രസ്താവനകള്‍ വസ്തുതാവിരുദ്ധമെന്ന് പാര്‍ട്ടി പ്രസിഡന്റ്  സാബു എം.ജേക്കബ് പറഞ്ഞു. 2015 മുതല്‍ ഇങ്ങോട്ട് നടന്ന എല്ലാ തെരഞ്ഞെടുപ്പുകളിലും മുഴുവന്‍ സ്ഥാനാര്‍ത്ഥികളുടെയും ചെലവുകള്‍ വഹിച്ചത് പാര്‍ട്ടിയാണെന്ന് അദ്ദേഹം പറഞ്ഞു. 

'' ഒരു രൂപ പോലും സ്വന്തം നിലയ്ക്ക് സ്ഥാനാര്‍ത്ഥികള്‍ക്ക് മുടക്കേണ്ടി വന്നിട്ടില്ല. കഴിഞ്ഞ നിയമസഭാ തെരഞ്ഞെടുപ്പില്‍ തൃക്കാക്കര, 'എ ക്ലാസ്' സീറ്റായി പരിഗണിച്ചാണ് പാര്‍ട്ടി പോരാട്ടത്തിനിറങ്ങിയത്. മികച്ച പ്രകടനം എന്‍.ഡി.എ മുന്നണിക്ക് തൃക്കാക്കരയില്‍ കാഴ്ചവെക്കാന്‍ സാധിച്ചു. ഇലക്ഷനു ശേഷം കൊല്ലം ജില്ലയുടെ പ്രസിഡന്റ് സ്ഥാനം അഖില്‍മാരാര്‍ ആവശ്യപ്പെട്ടിരുന്നു. സ്ഥാനാര്‍ത്ഥിയായിരുന്നുവെന്നതിന് പകരം അഖില്‍ പാര്‍ട്ടിയുടെ ബൂത്തു മുതല്‍ സംസ്ഥാനം വരെയുള്ള ഒരു ഘടകത്തിന്റെയും ഭാരവാഹിയല്ല. പണവും അധികാരവും സ്ഥാനമാനങ്ങളും ലക്ഷ്യമിട്ട് വരുന്നവര്‍ക്ക് പറ്റിയ പ്രസ്ഥാനമല്ല ട്വന്റി20.'' സാബു ജേക്കബ് കൂട്ടിച്ചേര്‍ത്തു.  

ALSO READ: 'സാബു ജേക്കബ് ചതിച്ചു, ഫോണ്‍ പോലും എടുക്കുന്നില്ല';അഖില്‍ മാരാര്‍ ട്വന്റി 20 വിട്ടു

തെരഞ്ഞെടുപ്പ് കഴിഞ്ഞതോടെ സാബു എം. ജേക്കബ് ഫോണ്‍ പോലും എടുക്കാന്‍ തയ്യാറാകുന്നില്ലെന്നും കൊട്ടാരക്കര മണ്ഡലത്തില്‍ സീറ്റ് ഉറപ്പുനല്‍കിയാണ് തന്നെ ട്വന്റി 20യിലേക്ക് ക്ഷണിച്ചത്. പിന്നീട് തൃപ്പൂണിത്തുറ നല്‍കാമെന്ന് പറഞ്ഞ് വഞ്ചിച്ചുവെന്നും അഖില്‍മാരാര്‍ നേരത്തെ വിമര്‍ശനം ഉന്നയിച്ച് പാര്‍ട്ടി വിട്ടിരുന്നു.