കൊല്ലം: ഫേസ്ബുക്കിലെ സുരക്ഷാ വീഴ്ച കണ്ടെത്തി തിരുത്തിയ കൊല്ലത്തുകാരന്‍ എന്‍ജിനീയറിങ് വിദ്യാര്‍ഥിയെ പട്ടത്താനം കലാവേദി ഗ്രന്ഥശാല ആദരിച്ചു.
ചാത്തന്നൂര്‍ എം.ഇ.എസ് ഇന്‍സ്റ്റിറ്റ്യൂട്ട് ഓഫ് ടെക്‌നോളജി ആന്റ് മാനേജ്‌മെന്റിലെ നാലാം വര്‍ഷ കമ്പ്യൂട്ടര്‍ സയന്‍സ് വിദ്യാര്‍ഥി കൊല്ലം മുണ്ടയ്ക്കല്‍ ശിവവിലാസത്തില്‍ അരൂണ്‍ എസ്. കുമാറിനെയാണു ഗ്രന്ഥശാലയുടെ 41-ാം വാര്‍ഷികാഘോഷങ്ങളുടെ ഭാഗമായി നടന്ന ചടങ്ങില്‍ ആദരിച്ചത്. ഗ്രന്ഥശാല പ്രസിഡന്റ് ജയന്‍ ഇടയ്ക്കാട് പൊന്നാടയണിയിച്ചു. ഫേസ്ബുക്കിന്റെ നിലനില്‍പ്പിനു തന്നെ ഭീഷണിയാവുമായിരുന്ന രണ്ടു പ്രധാനപിഴവുകള്‍ കണ്ടെത്തി പരിഹാരം നിര്‍ദേശിച്ച അരുണിനെ അമേരിക്കയിലെ സിലിക്കണ്‍വാലിയിലുള്ള ഫേസ്ബുക്ക് ആസ്ഥാനത്തും ആദരിച്ചിരുന്നു. കലാവേദി ഗ്രന്ഥശാലയുടെ 41-ാം വാര്‍ഷികവും ഓണാഘോഷങ്ങളും പള്ളിമുക്ക് ഡിവിഷന്‍ കൗണ്‍സിലര്‍ സലീന ഉദ്ഘാടനം ചെയ്തു. വിദ്യാഭ്യാസ അവാര്‍ഡും വിവിധ കലാകായിക മത്‌സരങ്ങളില്‍ വിജയികളായവര്‍ക്കുള്ള സമ്മാനവും കൗണ്‍സിലര്‍മാരായ പ്രേം ഉഷാര്‍, അഞ്ജു ആര്‍. ക്യഷ്ണന്‍ എന്നിവര്‍ വിതരണം ചെയ്തു. സെക്രട്ടറി സിജു പി. ജോണ്‍ സ്വാഗതവും ട്രഷറര്‍ ബിനോജ്കുമാര്‍ നന്ദിയും പറഞ്ഞു.