പാലക്കാട്: ആരോഗ്യ സര്‍വകലാശാല ഇന്റര്‍സോണ്‍ കലോത്സവങ്ങള്‍ക്കു നാളെ തുടക്കമാവും. പാലക്കാട് ഗവ. മെഡിക്കല്‍ കോളജില്‍ മൂന്നു ദിവസങ്ങളിലായാണ് മത്സരങ്ങള്‍ അരങ്ങേറുക.
മൂന്നു സോണുകളിലായി നടന്ന മത്സരങ്ങളില്‍ നിന്നും ഒന്നും രണ്ടും മൂന്നും സ്ഥാനം ലഭിച്ച എണ്ണൂറിലധികം മത്സരാര്‍ഥികള്‍ പങ്കെടുക്കുന്ന കലോത്സവത്തിനുള്ള ഒരുക്കങ്ങള്‍ പൂര്‍ത്തിയായതായി ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. ആദ്യമായാണ് പാലക്കാട് മെഡിക്കല്‍ കോളജ് ഇന്റര്‍സോണ്‍ കലോത്സവത്തിനു വേദിയാവുന്നത്.
സ്‌റ്റേജിതര മത്സരങ്ങളും നാടകവുമാണ് ആദ്യദിനം നടക്കുക. രാവിലെ പത്തിന് ക്വിസ് മത്സരങ്ങളോടെയാണ് സ്‌റ്റേജിതര മത്സരങ്ങള്‍ക്കു തുടക്കമാവുന്നത്. കലോത്സവത്തിന്റെ ഔപചാരിക ഉദ്ഘാടനം സാഹിത്യ നിരൂപക ആശാമേനോന്‍ ഉദ്ഘാടനം ചെയ്യും. 24ന് വൈകിട്ട് ആറിനു നടക്കുന്ന സമാപനസമ്മേളനം മന്ത്രി എ.കെ ബാലന്‍ ഉദ്ഘാടനം ചെയ്യും.
വാര്‍ത്താസമ്മേളനത്തില്‍ സംഘാടക സമിതി ഭാരവാഹികളായ ഡോ. എന്‍. മോഹന്‍ദാസ്, ഡോ. ജയദേവ്, സച്ചിന്‍ വി. ദാസ്, ഡോ. ഡെല്‍സണ്‍ഡേവിസ്, അതുല്‍ ആര്‍.പി സംബന്ധിച്ചു.