കോഴിക്കോട്: ബി.ജെ.പി ദേശീയ കൗണ്‍സില്‍ സമ്മേളനത്തില്‍ പങ്കെടുക്കാനായി ദേശീയ അധ്യക്ഷന്‍ അമിത് ഷാ കോഴിക്കോട്ടെത്തി. ഇന്നലെ രാവിലെ കരിപ്പൂര്‍ വിമാനത്താവളത്തില്‍ വിമാനമിറങ്ങിയ അമിത് ഷായെ നേതാക്കളും പ്രവര്‍ത്തകരും ചേര്‍ന്ന് സ്വീകരിച്ചു. സംസ്ഥാന പ്രസിഡന്റ് കുമ്മനം രാജശേഖരന്റെ നേതൃത്വത്തിലായിരുന്നു സ്വീകരണം.
പുഷ്പവൃഷ്ടിയും ചെണ്ട, പഞ്ചാരി മേളങ്ങളുടെ അകമ്പടിയോടെയുമായിരുന്നു സ്വീകരണം. ബി.ജെ.പി നേതാക്കളായ എച്ച് രാജ, ഒ രാജഗോപാല്‍ എം.എല്‍.എ, വി മുരളീധരന്‍, പി.കെ കൃഷ്ണദാസ്, സി.കെ പത്മനാഭന്‍, ബി.എല്‍ സന്തോഷ്, നളിന്‍കുമാര്‍ കട്ടീല്‍ എം.പി, അരവിന്ദ് മേനോന്‍, എം ഗണേശ്, അഡ്വ.പി.എസ് ശ്രീധരന്‍ പിളള തുടങ്ങിയ നേതാക്കള്‍ കരിപ്പൂരില്‍ എത്തിയിരുന്നു.
തുടര്‍ന്ന് ദേശീയ ഭാരവാഹികളുടെ യോഗം നടക്കുന്ന കടവ് റിസോര്‍ട്ടിലേയ്ക്ക് അമിത് ഷായെ ആനയിച്ചു. അമിത്ഷായ്‌ക്കൊപ്പം രാജീവ് പ്രതാപ് റൂഡി, ശ്രീകാന്ത് ശര്‍മ്മ, മുരളീധര്‍ റാവു, ബി.ജെ.പി ദേശീയ ജനറല്‍ സെക്രട്ടറി രാം ലാല്‍, അരവിന്ദ് മേനോന്‍ തുടങ്ങിയവരും ഉണ്ടായിരുന്നു. വൈകീട്ട് കോഴിക്കോട് തളി ക്ഷേത്രം, ശ്രീകണ്‌ഠേശ്വര ക്ഷേത്രം എന്നിവിടങ്ങളില്‍ അമിത്ഷാ ദര്‍ശനം നടത്തി.