പാലക്കാട്: ആരോഗ്യസര്‍വകലാശാല ഇന്റര്‍സോണ്‍ കലോത്സവം 'ത്രിവിധ' യ്ക്ക് പാലക്കാട് മെഡിക്കല്‍ കോളജില്‍ തുടക്കമായി. സ്‌റ്റേജിതര മത്സരങ്ങള്‍ സാഹിത്യ നിരൂപകന്‍ ആഷാ മേനോന്‍ ഉദ്ഘാടനം ചെയ്തു. ഒരുപാട് വായിക്കുന്നവന്‍ നല്ല എഴുത്തുകാരനാവണമെന്ന് നിര്‍ബന്ധമില്ലെന്ന് ആഷാ മേനോന്‍ പറഞ്ഞു. സംസ്‌കാരവും ആരോഗ്യവും പരസ്പരബന്ധിതമായതിനാല്‍ ആരോഗ്യമില്ലാതെ സംസ്‌കാരം സാധ്യമല്ല. ജോലിയെക്കുറിച്ചു മാത്രം ചിന്തിച്ചു ജീവിക്കരുതെന്നും പക്ഷപാതമില്ലാത്ത മനസ്സോടെ പ്രവര്‍ത്തിക്കണമെന്നും ചരവും അചരവും ചേര്‍ന്നതാണ് ലോകമെന്ന ബോധം മനുഷ്യനുണ്ടാവണമെന്നും അദ്ദേഹം പറഞ്ഞു.
പഠനം പോലെ തന്നെ ചികിത്സാരംഗത്തും ശുഷ്‌കാന്തി കാണിക്കണമെന്ന് അദ്ദേഹം പറഞ്ഞു. പ്രോഗ്രാം കമ്മിറ്റി ചെയര്‍മാന്‍ ഡോ. എന്‍. മോഹന്‍ദാസ് അധ്യക്ഷനായി. കെ.ഡി. പ്രസേനന്‍ എം.എല്‍.എ മുഖ്യാതിഥിയായി. മെഡിക്കല്‍ കോളജ് പ്രിന്‍സിപ്പല്‍ ഡോ. ടി.ബി. കുലാസ്, ഡോ. ഡെല്‍സണ്‍ ഡേവിസ്, സച്ചിന്‍ വി സുരേഷ്, ആര്‍. ജയദേവന്‍, ആര്‍.പി. അരുണ്‍ സംസാരിച്ചു.
സംസ്ഥാനത്തെ 77 മെഡിക്കല്‍, പാരാമെഡിക്കല്‍ കോളജുകളില്‍ നിന്നായി എണ്ണൂറിലേറെ വിദ്യാര്‍ഥികളാണ് കലോത്സവത്തില്‍ മാറ്റുരയ്ക്കുന്നത്. രണ്ടാം ദിവസമായ വെള്ളിയാഴ്ച രാവിലെ ഒമ്പതു മുതല്‍ കലാമത്സരങ്ങള്‍ ആരംഭിക്കും. വൈകിട്ട് നാലിന് എം.ബി. രാജേഷ് എം.പി മത്സരങ്ങള്‍ ഉദ്ഘാടനം ചെയ്യും.