പാനൂര്‍: മുളകുപൊടി വിതറി ഭര്‍തൃമതിയുടെ കഴുത്തില്‍ നിന്നു സ്വര്‍ണമാല പൊട്ടിക്കാന്‍ ശ്രമിച്ച സംഭവത്തില്‍ യുവാവിനെ പൊലിസ് അറസ്റ്റ് ചെയ്തു. ചെണ്ടയാട് നിള്ളങ്ങലിലെ ചാലില്‍ അഭിനേഷി(24)നെയാണ് പാനൂര്‍ എസ്.ഐ സുധാകരന്‍ അറസ്റ്റ് ചെയ്തത്. കഴിഞ്ഞ തിങ്കളാഴ്ച വൈകിട്ട് അഞ്ച് മണിക്കാണ് ഇയാള്‍ നിള്ളങ്ങലിലെ സായൂജ്യത്തില്‍ ബിജുവിന്റെ ഭാര്യ അംബികയുടെ കണ്ണില്‍ മുളകുപൊടി വിതറിയാണ് മാല പൊട്ടിക്കാന്‍ ശ്രമിച്ചത്. വീടിനുസമീപത്തെ കിണറ്റില്‍ നിന്നു വെള്ളമെടുക്കുന്നതിനിടെയായിരുന്നു സംഭവം. യുവതി ബഹളംവച്ചതിനെ തുടര്‍ന്ന് വീട്ടുകാര്‍ എത്തുമ്പോഴേക്കും പ്രതി ഓടി രക്ഷപ്പെടുകയായിരുന്നു. കോടതിയില്‍ ഹാജരാക്കിയ അഭിനേഷിനെ റിമാന്‍ഡ് ചെയ്തു.