ബഗ്ദാദ്: ഇറാഖില്‍ മൂന്നിടങ്ങളിലായുണ്ടായ ചാവേര്‍ സ്‌ഫോടനങ്ങളില്‍ 12 സൈനികര്‍ ഉള്‍പ്പെടെ 20 പേര്‍ കൊല്ലപ്പെട്ടു. തിക്രിത്തില്‍ പൊലിസ് ചെക് പോസ്റ്റിനു നേരെയുണ്ടായ കാര്‍ബോംബ് സ്‌ഫോടനത്തിലാണ് സൈനികര്‍ കൊല്ലപ്പെട്ടത്. തിക്രിത്ത് നഗരത്തിലെ പ്രവേശന കവാടത്തിലെ ചെക് പോസ്റ്റിലാണ് ആക്രമണം. ബഗ്ദാദിനു വടക്ക് 150 കി.മി അകലെയാണ് ആക്രമണം നടന്ന സ്ഥലം. ആരാണ് സ്‌ഫോടനം നടത്തിയതെന്ന് വ്യക്തമല്ലെന്ന് പൊലിസ് പറഞ്ഞു.
2015 ഏപ്രിലില്‍ ഐ.എസില്‍നിന്ന് സൈന്യം തിരിച്ചുപിടിച്ച നഗരമാണ് തിക്രിത്ത്. ശിര്‍ഖാത്ത് ടൗണ്‍ തിരിച്ചുപിടിച്ചതിനു പിന്നാലെയാണ് ആക്രമണം. ആദ്യ സ്‌ഫോടനം നടന്നതിന്റെ ഏഴു കിലോമീറ്റര്‍ പരിധിയില്‍ മറ്റു രണ്ടു സ്‌ഫോടനങ്ങള്‍കൂടി നടന്നു. പിക്കപ്പില്‍ സൂക്ഷിച്ച ബോംബാണ് പൊട്ടിത്തെറിച്ചത്. ഈ ആക്രമണത്തില്‍ എട്ടുപേര്‍ കൊല്ലപ്പെട്ടു.