തിരുവനന്തപുരം: പൊലിസ് സേനയിലെ പതിനാലു നായകള്‍ക്ക് ഇനി വിശ്രമ ജീവിതം. ഇവര്‍ പീപ്പിള്‍ ഫോര്‍ അനിമല്‍സ് തിരുവനന്തപുരത്ത് നടത്തുന്ന സുരക്ഷിത ഭവനത്തില്‍ വിശ്രമിക്കും. പ്രായം കൂടിയതും വിട്ടുമാറാത്ത രോഗവും മൂലമാണ് ഇവയ്ക്ക് വിശ്രമ ജീവിതം ഒരുക്കാന്‍ ഡി.ജി.പി ലോക്‌നാഥ് ബഹ്‌റ നിര്‍ദേശം നല്‍കിയത്. ഏഴു മുതല്‍ പന്ത്രണ്ടു വയസ് പ്രായമുള്ള നായകളെയാണ് സേനയില്‍ നിന്നും ഒഴിവാക്കിയത്.
പ്രമാദമായ നിരവധി കേസുകളില്‍ അന്വേഷണത്തിന് സഹായിച്ചിട്ടുള്ള നായകളാണ് ഇവ. നായകള്‍ക്ക് റിട്ടയര്‍മെന്റ് ആവശ്യപ്പെട്ട് മാസങ്ങള്‍ക്കു മുന്‍പു തന്നെ ജില്ലാ സൂപ്രണ്ടുമാര്‍ ഡി.ജി.പിയ്ക്ക് കത്ത് നല്‍കിയിരുന്നു. തിരുവനന്തപുരം, കോഴിക്കോട് യൂനിറ്റുകളില്‍പ്പെട്ട മൂന്നു വീതവും കൊച്ചി, പത്തനംതിട്ട, കോട്ടയം,വയനാട്, ആലപ്പുഴ, മലപ്പുറം, പാലക്കാട് സ്‌ക്വാഡുകളിലുള്ള ഓരോ നായകള്‍ക്കുമാണ് നിര്‍ബന്ധിത റിട്ടയര്‍മെന്റ് നല്‍കിയത്.
ഇവയെ എവിടെ സംരക്ഷിക്കുമെന്ന് പൊലിസിനു തന്നെ അറിയില്ലായിരുന്നു. തുടര്‍ന്ന് ദയാവധം നല്‍കാനുള്ള തയാറെടുപ്പിലായിരുന്നു പൊലിസ്.
അങ്ങനെയാണ് നായകളുടെ വന്ധ്യംകരണ പ്രക്രിയയ്ക്ക് നേതൃത്വം നല്‍കുന്ന കേന്ദ്ര മൃഗസംരക്ഷണ ബോര്‍ഡ് ഉദ്യോഗസ്ഥന്‍ സാലി കണ്ണന്‍ ഇവയെ ഏറ്റെടുക്കാന്‍ തീരുമാനിച്ചത്. നായകളെ മരണം വരെ സംരക്ഷിക്കണം. രണ്ടു വര്‍ഷം മുന്‍പ് ഇവര്‍ അഞ്ചു പൊലിസ് നായകളെ ഏറ്റെടുത്തിരുന്നു.