കുമളി: വിവിധ സംഭവങ്ങളിലായി മൂന്നു യുവാക്കള്‍ കഞ്ചാവുമായി പിടിയിലായി. മൂന്നു കിലോയോളം കഞ്ചാവ് എക്‌സൈസ് ഉദ്യോഗസ്ഥര്‍ പിടികൂടി. എറണാകുളം പള്ളുരുത്തി തുണ്ടിപ്പറമ്പില്‍ സുബാഷ് (31) നെ കുമളി എക്‌സൈസ് ഇന്‍സ്‌പെക്ടര്‍ ടി.ആര്‍ സെല്‍വരാജും എറണാകുളം നായരമ്പലം ചീനിക്കുഴി വീട്ടില്‍ ജോസ് (27), കോട്ടയം നീണ്ടൂര്‍ ചാമക്കാലായില്‍ മണിക്കുട്ടന്‍ (18) എന്നിവരെ വണ്ടിപ്പെരിയാര്‍ എക്‌സൈസ് ഇന്‍സ്‌പെക്ടര്‍ സി.കെ സുനില്‍രാജുമാണ് അറസ്റ്റ് ചെയ്തത്. ശനിയാഴ്ച രാത്രയിലാണ് രണ്ട് കിലോ കഞ്ചാവുമായി സുബാഷ് പിടിയിലായത്.
പ്ലാസ്റ്റിക് കവറില്‍ പൊതിഞ്ഞ് ഷോള്‍ഡര്‍ ബാഗില്‍ സൂക്ഷിച്ചാണ് കഞ്ചാവ് കൊണ്ടുവന്നത്. തമിഴ്‌നാട്ടിലെ കമ്പത്തു നിന്നും ഇരുപതിനായിരം രൂപയ്ക്കാണ് കഞ്ചാവ് വാങ്ങിയതെന്ന് ഇയാള്‍ മൊഴി നല്‍കി. രഹസ്യ വിവരത്തെ തുടര്‍ന്ന് നടത്തിയ പരിശോധനയിലാണ് ജോസിനേയും മണിക്കുട്ടനേയും വണ്ടിപ്പെരിയാര്‍ എക്‌സൈസ് ഇന്‍സ്‌പെക്ടര്‍ അറസ്റ്റ് ചെയ്തത്.
ജോസില്‍ നിന്നും ഒരു കിലോയും മണിക്കുട്ടനില്‍ നിന്നും ചെറുപൊതകളായി സൂക്ഷിച്ചിരുന്ന നൂറു ഗ്രാം കഞ്ചാവുമാണ് കണ്ടെടുത്തത്. സ്‌കൂള്‍ കോളജ് വിദ്യാര്‍ഥികളേയും യുവാക്കളേയും ലക്ഷ്യമിട്ടാണ് കഞ്ചാവ് എത്തിക്കുന്നതെന്ന് പിടിയിലായവര്‍ മൊഴി നല്‍കി. എന്‍.ഡി.പി.എസ് നിയമം അനുസരിച്ച് വണ്ടിപ്പെരിയാര്‍ റേഞ്ചില്‍ മാത്രമായി നൂറാമത്തെ കേസാണ് എക്‌സൈസ് ഇന്‍സ്‌പെക്ടര്‍ സി.കെ. സുനില്‍രാജ് രജിസ്റ്റര്‍ ചെയ്തത്.