കട്ടപ്പന: പച്ച ഏലക്ക മോഷ്ടിച്ചു ബൈക്കില്‍ കടത്തിയ തമിഴ് തൊഴിലാളി പിടിയിലായി. തമിഴ്‌നാട് ബോഡിനായ്ക്കന്നൂര്‍ 16 ശിവന്‍കോവില്‍ ബാങ്കരസ്വാമി(40) ആണ് പൊലിസ് പിടിയിലായത്. കൊച്ചറ ആനകണ്ടം മങ്കുഴിയില്‍ ജിമ്മിയുടെ ഏലത്തോട്ടത്തില്‍നിന്ന് 45 കിലോ പച്ച ഏലക്ക മോഷ്ടിച്ചു കടത്തുന്നതിനിടയിലാണ് ഇയാള്‍ പിടിയിലായത്.
മൂന്നുദിവസമായി ജിമ്മിയുടെ ഏലക്കാട്ടില്‍ ഇയാള്‍ പണിയെടുക്കകയായിരുന്നു. പച്ച ഏലക്ക ചുമക്കുന്നതിനിടെ ഒരുചാക്ക് ഏലക്കാ ഇയാള്‍ ഏലക്കാട്ടില്‍ ഒളിപ്പിച്ചു. പണികഴിഞ്ഞു പോയ ഇയാള്‍ രാത്രി തിരിച്ചെത്തി ഏലക്കാ മോഷ്ടിച്ച് ബൈക്കില്‍ പോകുന്നതിനിടെ ബൈക്ക് മറിയുകയായിരുന്നു. രാത്രി പന്ത്രണ്ടിനോടെയായിരുന്നു ഇത്. ബൈക്ക് മറിഞ്ഞതുകണ്ട നാട്ടുകാരില്‍ ഒരാള്‍ വിവരം പൊലിസില്‍ അറിയിച്ചു. സ്ഥലത്തെത്തിയ പൊലിസ് ഇയാളെ പിടികുടി ചോദ്യംചെയ്തപ്പോള്‍ മോഷണം സമ്മതിക്കുകയായിരുന്നു. തുടര്‍ന്ന് അറസ്റ്റ് ചെയ്ത് കോടതിയില്‍ ഹാജരാക്കി.