മലയിന്‍കീഴ്: നെല്ലിക്കാട് സ്വദേശി ഉദയകുമാറിനെ (40) വെട്ടിപ്പരുക്കേല്‍പ്പിച്ച കേസിലെ പ്രതി പിടിയില്‍. നെല്ലിക്കാട് ചപ്പാത്ത് കുളപ്പള്ളി വിളാകം വീട്ടില്‍ മോഹനന്‍നായരെ (58)യാണ് മാറനല്ലൂര്‍ പൊലിസ് അറസ്റ്റു ചെയ്തത്.
ഈ കഴിഞ്ഞ ഓഗസ്റ്റ് 21 രാത്രിയായിരുന്നു കേസിനാസ്പദമായ സംഭവം. മോഹനന്‍നായരുടെ നേതൃത്വത്തിലെത്തിയ നാലംഗസംഘം നെല്ലിക്കാട് ജങ്ഷനു സമീപത്തുവച്ച് ഉദയകുമാറിനെ ക്രൂരമായി മര്‍ദ്ദിച്ച ശേഷം തലയില്‍ വെട്ടുകയായിരുന്നു. ഗുരുതരമായി പരുക്കേറ്റ ഉദയകുമാര്‍ നെയ്യാറ്റിന്‍കര താലൂക്ക് ആശുപത്രിയില്‍ ചികിത്സയിലായിരുന്നു. മുന്‍ വൈരാഗ്യമാണ് ആക്രമണത്തിന് കാരണമെന്ന് പൊലിസ് പറഞ്ഞു. നെല്ലിക്കാട് ഭാഗത്തു നിന്ന് എസ്.ഐ ശാന്തകുമാറിന്റെ നേതൃത്വത്തില്‍ പിടികൂടിയ പ്രതിയെ കോടതിയില്‍ ഹാജരാക്കി. മോഹനന്‍നായരുടെ ബന്ധുക്കളായ സംഘത്തിലെ മറ്റ് മൂന്ന് പ്രതികള്‍ ഒളിവിലാണെന്നും പൊലിസ് അറിയിച്ചു.