മട്ടന്നൂര്‍: വെമ്പടിയില്‍ കാട്ടുപന്നിയുടെ ശല്ല്യം കാരണം ചെറുകിട കര്‍ഷകര്‍ വലയുന്നു. കഴിഞ്ഞ ഒരു മാസമായി പ്രദേശത്ത് നിരവധി വീട്ടുകാരാണു കൃഷിയിടങ്ങളിലെ നാശം കാരണം ദുരിതം പേറുന്നത്. കഴിഞ്ഞ ദിവസം വെമ്പടി മുനവ്വിറുല്‍ ഇസ്്‌ലാം മദ്‌റസയ്ക്കു സമീപം ചൂര്യോട്ട് ഇബ്രാഹിം, ചേമ്പില്‍ കുഞ്ഞാമിന എന്നിവരുടെ കൃഷിയിടങ്ങളാണു കാട്ടുപന്നി നശിപ്പിച്ചത്. ചേമ്പ്, വാഴ എന്നിവയാണു നശിപ്പിക്കപ്പെട്ടത്. തുടര്‍ച്ചയായി ഈ പ്രദേശത്തു കാട്ടുപന്നി ശല്യം രൂക്ഷമാണെന്നും ഇവര്‍ പരാതി പെടുന്നുണ്ട്.
വെമ്പടി മേഖലയില്‍ രാത്രികാലങ്ങളിലാണു കൃഷിയിടങ്ങള്‍ നശിപ്പിക്കപ്പെടുന്നത്. ഈ പ്രദേശത്ത് സി മൂസ്സ ഹാജി, സി.കെ ആസ്യോമ്മ എന്നിവരുടെ ചേമ്പ്, വാഴ കൃഷിയും കാട്ടുപന്നിയുടെ ആക്രമണത്തിനിരയായിട്ടുണ്ട്. ചെറുകിട കര്‍ഷകരെ സംരക്ഷിക്കാനും സഹായങ്ങള്‍ നല്‍കാനും  കൃഷി വകുപ്പ് തയാറാകണമെന്നാണ് കര്‍ഷകരുടെ ആവശ്യം.