മഞ്ചേരി: മെഡി.കോളജിന്റെ നിലവിലെ സ്ഥിതി ദയനീയമാണെന്ന് മഞ്ചേരി ബ്ലോക്ക് കോണ്‍ഗ്രസ് കമ്മിറ്റി അഭിപ്രായപ്പെട്ടു. കോളജിലെ പ്രശ്‌നങ്ങള്‍ സംബന്ധിച്ച്  നേരിട്ടു മനസിലാക്കുന്നതിനായി  ബ്ലോക്ക് കോണ്‍ഗ്രസ് കമ്മിറ്റി നടത്തിയ സിറ്റിങിലാണ് ഇത്തരത്തില്‍ വിലയിരുത്തിയത്.
 മറ്റു മെഡി.കോളജുകളെ അപേക്ഷിച്ച് ഏറ്റവും കൂടുതല്‍ രോഗികള്‍ പ്രയോജനപ്പെടുത്തുന്ന ഒ.പിയാണ് മഞ്ചേരി മെഡി.കോളജിന്റെത്. 2000 രോഗികള്‍ വരെ ചില സമയങ്ങളില്‍ ഇവിടെ എത്താറുണ്ട്. എന്നിട്ടും പരിമിതമായ സൗകര്യമാണ് നിലവിലുള്ളത്. 2.60 കോടിയുടെ പുതിയ ഒ.പി ബ്ലോക്ക് ഇപ്പോഴും ടെന്‍ഡറാവാതെ കിടക്കുകയാണ്.
പ്രശ്‌നങ്ങളെ സംബന്ധിച്ച് പ്രിന്‍സിപ്പല്‍ ഇന്‍ചാര്‍ജ് ഡോ. സിറിയക്ക് ജോബ്, ആശുപത്രി സൂപ്രണ്ട് ഡോ. നന്ദകുമാര്‍, ജൂനിയര്‍ സൂപ്രണ്ട് ബഷീര്‍ ആലങ്ങാടന്‍, വിദ്യാര്‍ഥി യൂനിയന്‍ ഭാരവാഹികള്‍ എന്നിവരുമായി സമിതി നേതാക്കള്‍ സംസാരിച്ചു. പ്രഥമ സിറ്റിങില്‍ ബ്ലോക്ക് കോണ്‍ഗ്രസ് പ്രസിഡന്റ് വല്ലാഞ്ചിറ ഹുസൈന്‍, ഭാരവാഹികളായ പി.കെ സത്യപാലന്‍ പുല്ലഞ്ചേരി അബ്ദുല്ല, വിജീഷ് എളങ്കൂര്‍, അജിത കുതിരാടത്ത്, മണ്ഡലം പ്രസിഡന്റ് ഹനീഫ് പുല്ലൂര്‍, പി.കെ സലാം പങ്കെടുത്തു.