കൂറ്റനാട്: നാഗലശ്ശേരി പഞ്ചായത്തില്‍ അക്ഷയ സെന്റര്‍ ഇല്ലാത്തത് ജനങ്ങളെ വലക്കുന്നു. തൃത്താല ബ്ലോക്കിലെ എല്ലാ പ്രധാന സര്‍ക്കാര്‍ ഓഫിസുകളും പ്രവര്‍ത്തിക്കുന്ന നാഗലശ്ശേരി പഞ്ചായത്തില്‍ അക്ഷയ സെന്ററില്ല. കൂറ്റനാട് തണ്ണിര്‍ കോട് റോഡില്‍ പ്രവര്‍ത്തിക്കുന്ന പട്ടിത്തറ പഞ്ചായത്തിലെ അക്ഷയ സെന്ററാണ് പതിനായിരക്കണക്കിനു വരുന്ന ആളുകളുടെ ഏക ആശ്രയം.
തൃത്താല ബ്ലോക്ക് ഓഫിസ്, പട്ടികജാതിപട്ടികവര്‍ഗ്ഗ വികസന ഓഫിസ്, ക്ഷീര വികസന ഓഫിസ് എന്നിവ ബ്ലോക്കിലെ പ്രധാന സെന്ററായ നാഗലശ്ശേരി പഞ്ചായത്തിലാണ് പ്രവര്‍ത്തിക്കുന്നത്.
ഒട്ടുമിക്ക സര്‍ക്കാര്‍ ഓഫിസുകളിലും അപേക്ഷകള്‍ ഓണ്‍ലൈനായി നല്‍കാന്‍ അവസരമുള്ളതിനാല്‍ ജനങ്ങള്‍ക്ക് അക്ഷയ സെന്ററിന്റെ സഹായം ആവശ്യമാണ്. നിലവിലെ സെന്ററിലേക്ക് പട്ടിത്തറ പഞ്ചായത്തിലെ അപേക്ഷകള്‍ക്കു പുറമെ നാഗലശ്ശേരിയിലെ അപേക്ഷകള്‍ കൂടി എത്തുമ്പോള്‍ സൗകര്യം പരിമിതമാകുന്നതായി ഗുണഭോക്താക്കള്‍ പറയുന്നു.