വടകര: മാഹി സെന്റ് തെരേസാസ് പള്ളിയിലെ തിരുനാള്‍ മഹോത്സവത്തിനു ഒക്ടോബര്‍ അഞ്ചിനു കൊടിയേറും. 22 വരെ നടക്കുന്ന ആഘോഷത്തില്‍ 15നാണു പ്രധാന തിരുനാളെന്ന് ഇടവക വികാരി ഫാ. ഡോ. ജെറോം ചിങ്ങന്തറ വാര്‍ത്താസമ്മേളനത്തില്‍ അറിയിച്ചു.
അഞ്ചിനു രാവിലെ 11.30നു കൊടിയുയര്‍ത്തി 12നു തിരുസ്വരൂപം പൊതുവണക്കത്തിനായി സമര്‍പ്പിക്കുന്നതോടെ തിരുനാളിനു തുടക്കമാകും. വൈകിട്ട് 5.45നു കണ്ണൂര്‍ രൂപതാ ബിഷപ്പ് ഡോ. അലക്‌സ് വടക്കുംതലയ്ക്കു സ്വീകരണവും ആറിനു അദ്ദേഹത്തിന്റെ കാര്‍മികത്വത്തില്‍ സാഘോഷ ദിവ്യബലിയും നടക്കും.
ഒന്‍പതിനു രാവിലെ 9.15നു ലാറ്റിന്‍ ഭാഷയില്‍ ദിവ്യബലി, 12നു വൈകിട്ട് ആറിന് സുല്‍ത്താന്‍പേട്ട് രൂപതാ വികാരി മോണ്‍. മദലെയ് മുത്തുവിന്റെ കാര്‍മികത്വത്തില്‍ തമിഴ് ഭാഷയില്‍ ദിവ്യബലി, 13നു വൈകിട്ട് ആറിനു കോഴിക്കോട് രൂപത വികാരി ജനറല്‍ മോണ്‍. തോമസ് പനയ്ക്കലിന്റെ കാര്‍മികത്വത്തില്‍ സാഘോഷ ദിവ്യബലി,14നു വൈകിട്ട് അഞ്ചിനു വരാപ്പുഴ അതിരൂപത മെത്രാപ്പൊലീത്ത ഡോ. ഫ്രാന്‍സിസ് കല്ലറയ്ക്കലിനു സ്വീകരണവും നടക്കും. തുടര്‍ന്ന് അദ്ദേഹത്തിന്റെ നേതൃത്വത്തില്‍ സാഘോഷ ദിവ്യബലി, വൈകിട്ട് ഏഴിനു മയ്യഴി അമ്മയുടെ ദീപാലംകൃതമായ തിരുസ്വരൂപം വഹിച്ചുകൊണ്ടുള്ള നഗരപ്രദക്ഷിണവും നടക്കും.
പ്രധാന തിരുനാള്‍ദിനത്തില്‍ പുലര്‍ച്ചെ രണ്ടു മുതല്‍ ഏഴു വരെ സെമിത്തേരി റോഡ് മുതല്‍ പള്ളിവരെ ശയനപ്രദക്ഷിണം, രാവിലെ 10നു കോഴിക്കോട് രൂപത ബിഷപ്പ് ഡോ. വര്‍ഗീസ് ചക്കാലയ്ക്കലിനു സ്വീകരണം, 10.30നു അദ്ദേഹത്തിന്റെ നേതൃത്വത്തില്‍ പൊന്തിഫിക്കല്‍ ദിവ്യബലി, 18നു വൈകിട്ട് ആറിനു സാഘോഷ ദിവ്യബലി, 19നു വൈകിട്ട് ആറിനു കൊങ്കിണി ഭാഷയില്‍ ദിവ്യബലി എന്നിവ നടക്കും.