ഗുവാഹത്തി: ഇന്ത്യന്‍ സൂപ്പര്‍ ലീഗിന്റെ മൂന്നാം സീസണ്‍ പോരാട്ടങ്ങള്‍ക്ക് ഇന്നു തുടക്കമാകും. ഗുവാഹത്തില്‍ നടക്കുന്ന ആദ്യ മത്സരത്തില്‍ കേരളത്തിന്റെ സ്വന്തം ടീം കേരള ബ്ലാസ്റ്റേഴ്‌സ്- നോര്‍ത്ത്ഈസ്റ്റ് യുനൈറ്റഡുമായി ഏറ്റുമുട്ടും. ഇന്നു മുതല്‍ ഡിസംബര്‍ പതിനെട്ടു വരെ ഏതാണ്ട് രണ്ടര മാസക്കാലം ഇനി ഐ.എസ്.എല്‍ ആരവത്തിലാകും ഇന്ത്യന്‍ ജനത. എട്ടു ടീമുകള്‍ തമ്മിലാണ് പോരാട്ടം. ഓരോ ടീമിനും ഹോം, എവേ രീതിയില്‍ 14 വീതം മത്സരങ്ങളാണുണ്ടാകുക. ഡിസംബര്‍ പതിനെട്ടിനാണ് ഫൈനല്‍ മത്സരം.
കേരള ബ്ലാസ്റ്റേഴ്‌സിന്റെ കൊച്ചിയിലെ ആദ്യ ഹോം മത്സരം ഒക്ടോബര്‍ അഞ്ചിനു നടക്കും. അത്‌ലറ്റിക്കോ ഡി കൊല്‍ക്കത്തയാണ് ആദ്യ ഹോം മത്സരത്തിലെ എതിരാളികള്‍. കൊച്ചിയിലെ രണ്ടാം മത്സരം ഒക്ടോബര്‍ ഒന്‍പതിനാണ്. ഡല്‍ഹി ഡൈനാമോസാണ് എതിരാളികള്‍. ഒക്ടബോര്‍ 14നു മൂന്നാം ഹോം പോരാട്ടത്തില്‍ മുംബൈ സിറ്റി എഫ്.സിയുമായി ബ്ലാസ്റ്റേഴ്‌സ് ഏറ്റുമുട്ടും. നവംബര്‍ എട്ടിന് നാലാം ഹോം മത്സരത്തില്‍ എഫ്.സി ഗോവയാണ് കേരളത്തിന്റെ എതിരാളികള്‍. നവംബര്‍ 12നു നിലവിലെ ചാംപ്യന്‍മാരായ ചൈന്നൈയിന്‍ എഫ്.സിയുമായി ബ്ലാസ്റ്റേഴ്‌സ് കൊച്ചിയില്‍ പോരിനിറങ്ങും. നവംബര്‍ 25നു നടക്കുന്ന പോരാട്ടത്തില്‍ എഫ്.സി പൂനെ സിറ്റിയാണ് കൊച്ചിയിലെ ബ്ലാസ്റ്റേഴ്‌സിന്റെ എതിരാളികള്‍. ഡിസംബര്‍ നാലിനു അവസാന ഹോം മത്സരത്തില്‍ നോര്‍ത്ത്ഈസ്റ്റുമായി ബ്ലാസ്റ്റേഴ്‌സ് കൊമ്പുകോര്‍ക്കും.