മമ്പാട്: സി.പി.എം പിടിച്ചെടുത്ത മമ്പാട് കൊറത്തിയാര്‍ പൊയിലിലെ മിച്ചഭൂമിയില്‍ 16-ാം ദിവസം പിന്നിട്ടപ്പോള്‍ 80 കുടിലുകള്‍ പൊങ്ങി. ഇതില്‍ മൂന്ന് കുടിലുകളില്‍ താമസവും തുടങ്ങിയിട്ടുണ്ട്. കമുങ്ങും മുളകളും ഷീറ്റും ഉപയോഗിച്ചാണ് കുടിലുകള്‍ കെട്ടിയിരിക്കുന്നത്. അതേസമയം ഭക്ഷണം പാകം ചെയ്യാനുള്ള അരികളും മറ്റും പലരും ഇവിടേക്ക് എത്തിക്കുകയാണ്. കുടിവെള്ള പ്രശ്‌നവും അടിസ്ഥാന സൗകര്യങ്ങളും ഒരുക്കിയിട്ടുമില്ല. വര്‍ഷങ്ങളായി തലചായ്ക്കാനിടമില്ലാതെ കഴിയുകയായിരുന്നുവെന്നും അതിനാലാണ് കുടില്‍ കെട്ടിയതെന്നും ഇവിടെ താമസമാക്കിയ ജാനകി പറഞ്ഞു. അടിസ്ഥാന സൗകര്യങ്ങളൊരുക്കാന്‍ ബന്ധപ്പെട്ടവര്‍ തയാറാകണമെന്ന് ഇവര്‍ പറയുന്നു. വരും ദിവസങ്ങളില്‍ കൂടുതല്‍ പേര്‍ താമസിക്കാനെത്തുമെന്നാണ് സൂചന