വണ്ടൂര്‍: വണ്ടൂര്‍ ബ്ലോക്ക് പഞ്ചായത്ത് ഓഫിസിലെ സാമ്പത്തിക തട്ടിപ്പുമായി ബന്ധപെട്ട് വണ്ടൂരിലെ വിവിധ സ്ഥാപനങ്ങളില്‍ പൊലിസ് പരിശോധന നടത്തി. തട്ടിപ്പിനായി ഉപയോഗിച്ച സീലും വ്യാജരേഖകകളും കണ്ടെത്തുന്നതിനായാണ് പരിശോധന നടത്തിയത്. പണം തട്ടാനുപയോഗിച്ച സ്‌റ്റേറ്റ്‌മെന്റിലെ സീലില്‍ മീഡിയാ ടെക് കംപ്യൂട്ടര്‍ എന്നാണ് രേഖപെടുത്തിയട്ടുളളത്. ഇതിന്റെയടിസ്ഥാനത്തില്‍ വണ്ടൂരിലെ പ്രസുകളിലും ചില കംപ്യൂട്ടര്‍ സെന്ററുകളിലും പൊലിസ് പരിശോധന നടത്തി.
 ബി.ഡി.ഒയുടെ വ്യാജ ഒപ്പിട്ടു ചെക്കുകള്‍ പിന്‍വലിച്ച സംഭവത്തില്‍ ബാങ്ക് ജീവനക്കാരുടെ പക്കല്‍ ഗുരുതരമായ വീഴ്ചയാണ് സംഭവിച്ചിട്ടുള്ളത്. തട്ടിപ്പിന്റെ മുഖ്യ സൂത്രധാരകനെന്ന് പറയപ്പെടുന്ന മുന്‍ ജീവനക്കാരനായ അലിഹസന്‍ ഇപ്പോഴും ഒളിവിലാണ്. ഇതോടൊപ്പം ബ്ലോക്ക് പഞ്ചായത്തില്‍ മാസങ്ങള്‍ക്കു മുന്‍പ് അസമയത്ത് നിലവിലെ ബി.ഡി.ഒയും ആരോപണ വിധേയനായ അലിഹസനും എത്തിയത് സംബന്ധിച്ച വിവാദവും കത്തുകയാണ്. സ്ഥലം മാറിപ്പോയതിനു ശേഷം ഞായറാഴ്ചയും അര്‍ധരാത്രിയിലും ഇവര്‍ ഓഫിസിലെത്തിയത് ഏറെ വിവാദമായിരുന്നു.