എടവണ്ണപ്പാറ: ഏറെക്കാലമായി ദുരിതക്കഥകളുമായി അധികൃതരുടെ മുന്നിലെത്തിയിട്ടും പരിഹാരമാവാതെ കിടന്ന റോഡ് നാട്ടുകാര്‍ തന്നെ നന്നാക്കി. ചീക്കോട് കുടിവെള്ള പദ്ധതിയുടെ പൈപ്പുകള്‍ സ്ഥാപിക്കുന്നതിനായി കീറിമുറിച്ച എടവണ്ണപ്പാറ കൊണ്ടോട്ടി റോഡിലെ ഇരുപ്പംതൊടി മുതല്‍ കച്ചേരിത്തടം വരെയുള്ള റോഡാണ് നാട്ടുകാര്‍ നന്നാക്കിയത്. പൈപ്പുകള്‍ സ്ഥാപിക്കുന്നതിനായി കീറിയ കുഴികള്‍ മണ്ണിട്ട് നികത്തിയന്നല്ലാതെ ടാറിങ് ഉള്‍പ്പടെയുള്ള നിര്‍മാണ പ്രവൃത്തികള്‍ നടത്താത്തതിനാല്‍ റോഡിന്റെ വശങ്ങളിലുള്ള കുഴിയില്‍ വാഹനങ്ങള്‍ അകപ്പെട്ട് ഈ പ്രദേശങ്ങളില്‍ അപകടം പതിവായിരുന്നു. ഐഡിയല്‍ ക്ലബിന്റെ നേതൃത്വത്തില്‍ നാട്ടിലെ നൂറോളം ആളുകള്‍ ചോര്‍ന്നാണ് റോഡ് നന്നാക്കാനിറങ്ങിയത്. പഞ്ചായത്തംഗം സമദ് പൊന്നാട്, സി.ടി സൈതലവി, സി.ടി ഗഫൂര്‍, യൂസുഫ്, റാഷിദ് തുടങ്ങിയവര്‍ നേതൃത്വം നല്‍കി.