കൊച്ചി: പെരുമ്പാവൂരില്‍ കൊല്ലപ്പെട്ട നിയമവിദ്യാര്‍ഥി ജിഷയുടെ കൊലക്കേസ് അന്വേഷണത്തിന് പത്താം ദിവസമായ ഇന്നും വ്യക്തതയായില്ല. അയല്‍വാസിയിലേക്കും അന്യസംസ്ഥാന തൊഴിലാളികളിലേക്കും വ്യാപിപ്പിച്ച അന്വേഷണം ഇപ്പോഴും ഒരു തുമ്പുമില്ലാതെ നില്‍ക്കുകയാണ്. ഇതിനിടയില്‍ ജിഷയുടെ വീടിനടുത്ത് നിന്നും കണ്ടെടുത്ത ആയുധത്തില്‍ രക്തകറയില്ലെന്ന് പൊലിസ് പറയുന്നു. നാല് ആയുധങ്ങളാണ് ജിഷയുടെ വീടിന് സമീപത്തുനിന്ന് കണ്ടെടുത്തത് എന്നാല്‍ പ്രത്യക്ഷത്തില്‍ അവയില്‍ രക്തക്കറയൊന്നും കണ്ടെത്താന്‍ കഴിഞ്ഞിട്ടില്ല. എന്നാല്‍ ആയുധങ്ങല്‍ ഫോറന്‍സിക് പരിശോധനയ്ക്ക് അയച്ചിട്ടുണ്ട്. അതേ സമയം ജിഷയുടെ വീട്ടില്‍ നിന്നും ലഭിച്ച വിരലടയാളവും പൊലിസ് പ്രതികളെന്നു സംശയിച്ച് കസ്റ്റഡിയിലുള്ളവരുടെ വിരലടയാളവുമായി സാമ്യമില്ലെന്നാണ് റിപ്പോര്‍ട്ടുകള്‍. അയല്‍വാസികളടക്കം നിരവധിപേരെ പൊലിസ് ചോദ്യം ചെയ്തിട്ടുണ്ട്. ഇതിനിടയില്‍ അന്വേഷണം ജിഷയുടെ സഹോദരിയുടെ സുഹൃത്തിലേക്കും എത്തിയിട്ടുണ്ട്. അന്വേഷണ സംഘം അയല്‍വാസികളുടെ സഹായത്തോടെ തയ്യാറാക്കിയ രേഖാ ചിത്രവുമായും ഇയാള്‍ക്ക് സാമ്യമുണ്ട്. ഇയാളെ സംഭവത്തിന് ശേഷം കാണാതായതും സംശയം ഉണ്ടാക്കുന്നു. പ്രതിയിലേക്ക് ഇനി അധികദൂരമില്ലെന്നും പ്രതിക്കായുള്ള പഴുതടച്ച അന്വേഷണം പുരോഗമിക്കുകയാണെന്നും ഡി.ജി.പി വ്യക്തമാക്കി.