കൊച്ചി: ബി.എസ്.എന്‍.എല്‍ ലാന്‍ഡ് ഫോണ്‍ ബ്രോഡ് ബാന്റ് ഓഫറുകള്‍ ഗ്രാമീണ മേഖലകളിലേക്ക് എത്തുന്നില്ല. ലാന്‍ഡ് ഫോണിനും ബ്രോഡ്ബാന്റ് ഇന്റര്‍ നെറ്റ് സംവിധാനത്തിനും വന്‍ ഓഫറുകളാണ് ബി.എസ്.എന്‍.എല്‍ നല്‍കിയിരിക്കുന്നത്. ഇതറിഞ്ഞ് പുതിയ കണക്ഷന്‍ എടുക്കാന്‍ ബി.എസ്.എന്‍.എല്‍ ഓഫിസുകളില്‍ എത്തുന്നവര്‍ക്ക് നിരാശമാത്രമാണ് ഫലം.
കേബിളുകളുടെ ലഭ്യതക്കുറവാണ് പുതിയ കണക്ഷന്‍ ലഭിക്കുന്നതിന് തടസമാകുന്നത്. മാത്രമല്ല നിലവില്‍ കേബിളുകള്‍ സ്ഥാപിച്ചിട്ടുള്ള മേഖലകളില്‍ മാത്രമാണ് കണക്ഷന്‍ ലഭിക്കുക. അല്ലാത്തവര്‍ക്ക് ഇത് വെറും വ്യാമോഹം മാത്രം. പുതിയ ഭൂഗര്‍ഭ കേബിളുകള്‍ സ്ഥാപിച്ച് കണക്ഷന്‍ നല്‍കാന്‍ നിലവില്‍ സംവിധാനമില്ലെന്നാണ് ബി.എസ്.എന്‍.എല്‍ അധികൃതര്‍തന്നെ വ്യക്തമാക്കുന്നത്. ഗ്രാമിണ മേഖലകളില്‍ നിലവിലുള്ള ഭൂരിഭാഗം കേബിളുകളും തകരാറിലാണ്.
കൃത്യമായ അറ്റകുറ്റപ്പണികള്‍ നടത്താത്തതാണ് കാരണം. കൂടാതെ നിലവില്‍ കേബിളുകള്‍ സ്ഥാപിച്ചിരിക്കുന്നതിനു മൂകളിലൂടെയാണ് റോഡ് നിര്‍മാണവും നവീകരണവും നടക്കുന്നത്. മിക്കസ്ഥലങ്ങളിലും കേബിള്‍ പോകുന്ന സ്ഥലങ്ങള്‍ക്ക് മുകളില്‍ രണ്ടും മൂന്നു അടി മണ്ണിട്ടുയര്‍ത്തിയാണ് റോഡ് നിര്‍മാണം. കേബിളുകള്‍ പൊട്ടുകയോ കേടാവുകയോ ചെയ്താല്‍ നന്നാക്കുന്നതിന് ഇത്മൂലം സാധിക്കില്ല. മാത്രവുമല്ല വര്‍ഷങ്ങള്‍ക്കു മുന്‍പ് സ്ഥാപിച്ച കേബിള്‍ ജങ്ഷനുകള്‍പോലും എവിടെയാണെന്ന് ജീവനക്കാര്‍ക്കും നിശ്ചയമില്ല.
ലാന്‍ഡ് ഫോണ്‍ കണക്ഷന് വന്‍ ഓഫറുകള്‍ പ്രഖ്യാപിച്ചതോടെ മുന്‍പ് കണക്ഷന്‍ റദ്ദാക്കിയവരില്‍ ഭൂരിഭാഗവും പുതിയ കണക്ഷനായി എത്തുന്നുണ്ട്. എന്നാല്‍ ഇവരുടെ വീടുകളില്‍ സ്ഥാപിച്ചിരുന്ന കേബിളുകള്‍ ഇപ്പോള്‍ പ്രവര്‍ത്തനരഹിതമായതിനാല്‍ കണക്ഷന്‍ നല്‍കാന്‍ കഴിയാത്ത അവസ്ഥയാണ്.
കൂടാതെ കേബിള്‍ വഴിയുള്ള ഫോണ്‍, ഇന്റര്‍നെറ്റ് കണക്ഷനുകള്‍ക്ക് മാത്രമായി ഓഫര്‍ പരിമിതപ്പെടുത്തിയതും ഉപോഭോക്താക്കളെ വലയ്ക്കുന്നുണ്ട്. സംസ്ഥാനത്ത് വില്‍(വയര്‍ലസ്) ഫോണുകളും ഇന്റര്‍നെറ്റിനായി വൈമാക്‌സ് കണക്ഷനുകളുമാണ് ബി.എസ്.എന്‍.എല്‍ ഇപ്പോള്‍ നല്‍കുന്നത് . ഇവയ്ക്ക് നിലവിലെ ഓഫറുകള്‍ ബാധകവുമല്ല.
ജീവനക്കാരുടെ നിഷേധാത്മക നിലപാടുകളാണ് ഉപഭോക്താക്കളെ ബി.എസ്.എന്‍.എല്‍ കണക്ഷനുകള്‍ റദ്ദാക്കാന്‍ നിര്‍ബന്ധിതരാക്കിയതെന്ന് അരോപണം ഉയര്‍ന്നിരുന്നു. ഇതോടാപ്പം മറ്റ് കമ്പനികള്‍ ലാന്‍ഡ് ഫോണകളുമായി വന്നതോടെ ഭൂരിപക്ഷം ഉപഭോക്താക്കളും ബി.സ്.എല്‍.എല്ലിനെ കൈവിട്ടു.
ഇത് തിരിച്ചറിഞ്ഞതോടെയാണ് ജനപ്രിയ പദ്ധതികളുമായി ബി.എസ്.എന്‍.എല്‍ ശക്തമായ തിരിച്ചുവരവിനൊരുങ്ങിയത്.