ന്യൂഡല്‍ഹി: രാഷ്ട്രപതി സ്ഥാനത്തേക്ക് രണ്ടാമൂഴത്തിനില്ലെന്ന് വ്യക്തമായതോടെ പ്രണബ് മുഖര്‍ജിക്കു വിരമിച്ച ശേഷം കഴിയാന്‍ പുതിയ ബംഗ്ലാവ് തയ്യാറായി. ഡോക്ടര്‍ എ.പി.ജെ അബ്ദുല്‍ കലാം റോഡിലെ ബംഗ്ലാവിലാവും വിരമിച്ച ശേഷം പ്രണബ് കഴിയുക.

രാഷ്ട്രപതി പദവിയില്‍ പ്രണബ് മുഖര്‍ജിയുടെ കാലാവധി അടുത്തവര്‍ഷം ജൂലൈയിലാണ്അവസാനിക്കുന്നത്. ഈ സാഹചര്യത്തില്‍ രാഷ്ട്രപതിയ്ക്കായി സര്‍ക്കാര്‍ ഇതിനകം തന്നെ വീട് കണ്ടെത്തിയിട്ടുണ്ട്. 34, ഡോക്ടര്‍ എ.പി.ജെ അബ്ദുല്‍ കലാം റോഡ് എന്ന വിലാസത്തിലുള്ള വസതി അന്തരിച്ച ലോക്‌സഭാ സ്പീക്കര്‍ പി.എ സാങ്മയുടെതു കൂടിയാണ്.

നിലവില്‍ സാങ്മയുടെ കുടുംബമാണ് അവിടെ താമസിക്കുന്നത്. 2012ല്‍ എന്‍.ഡി.എ സ്ഥാനാര്‍ഥിയായിരുന്ന സാങ്മയെ തോല്‍പ്പിച്ചായിരുന്നു പ്രണബ് മുഖര്‍ജി രാജ്യത്തിന്റെ 13 രാഷ്ട്രപതിയായത്. സാങ്മയുടെ കൂടുംബത്തിന് വൈകാതെ പ്രണബ് മുഖര്‍ജിയ്ക്കായി ഈ വീട് ഒഴിയേണ്ടി വരും. സാങ്മയുടെ മകന്‍ കോണ്‍റാഡ് മേഘാലയയില്‍ നിന്ന് എം.പിയായി തിരഞ്ഞെടുക്കപ്പെട്ടിട്ടുണ്ടെങ്കിലും ഈ വീട്ടില്‍ തുടരാന്‍ സാധിക്കില്ല.

ഉന്നതരായ ആളുകള്‍ക്ക് അനുവദിക്കുന്ന എട്ടാം വിഭാഗത്തില്‍പ്പെട്ട വീടാണിത്. ഇത് എം.പിക്ക് അനുവദിക്കാന്‍ പ്രോട്ടോകോളില്ല. സാങ്മയുടെ കുടുംബത്തെ വൈകാതെ അവിടെ നിന്ന് ഒഴിപ്പിക്കുമെന്ന് നഗരവികസനമന്ത്രാലയം അറിയിച്ചു. തുടര്‍ന്ന് രാഷ്ട്രപതിയുടെ ആവശ്യപ്രകാരമുള്ള നവീകരണം നടത്തിയ ശേഷമായിരിക്കും വീടു കൈമാറുക.

വിരമിക്കുന്ന മറ്റുള്ളവര്‍ക്ക് ലഭിക്കുന്ന ടെലിഫോണ്‍ ഇന്റര്‍നെറ്റ് കണക്ഷന്‍ തുടങ്ങിയവയ്ക്ക് പുറമെ ഓഫിസ് സ്റ്റാഫുകള്‍, കാര്‍ ഡ്രൈവര്‍ തുടങ്ങിയവ മുന്‍ രാഷ്ട്രപതിയ്ക്ക് ലഭിക്കും. സ്വന്തം കാറാണ് ഉപയോഗിക്കുന്നതെങ്കില്‍ പ്രതിമാസം 250 ലിറ്റര്‍ പെട്രോളും ഡ്രൈവര്‍ക്കുള്ള ശമ്പളവും ലഭിക്കും.

എല്ലാ സൗകര്യങ്ങളുമുള്ള വീട് ഇന്ത്യയിലെവിടെയും വിരമിച്ച പ്രസിഡന്റിന് വാടക നല്‍കാതെ ഉപയോഗിക്കാം. ജീവിതകാലം മുഴുവന്‍ വൈദ്യുതി, വെള്ളം എന്നിവയും സൗജന്യമായി ലഭിക്കും.