കൊല്ലം: കേരള മീഡിയ അക്കാദമി സംസ്ഥാനത്തെ സ്‌കൂളുകളില്‍ മീഡിയ ക്ലബ്ബുകള്‍ ആരംഭിക്കുമെന്ന് ചെയര്‍മാന്‍ ആര്‍.എസ് ബാബു പറഞ്ഞു.
ഗാന്ധി ജയന്തി വാരാഘോഷങ്ങളുടെ ഭാഗമായി ജില്ലാ ഭരണകൂടവും ഇന്‍ഫര്‍മേഷന്‍പബ്ലിക് റിലേഷന്‍സ് വകുപ്പും വിവിധ ഗാന്ധിയന്‍ സംഘടനകളും സംയുക്തമായി കൊല്ലം സോപാനം ഓഡിറ്റോറിയത്തില്‍ സംഘടിപ്പിച്ച ഗാന്ധികലോത്സവം ഉദ്ഘാടനം ചെയ്യുകയായിരുന്നു അദ്ദേഹം.
വിദ്യാര്‍ഥികള്‍ക്ക് വൈവിധ്യമാര്‍ന്ന മാധ്യമ മേഖലകളെ അടുത്തറിയാനും അതുവഴി ചരിത്രവും ആനുകാലിക രാഷ്ട്രീയ, സാമൂഹിക സാഹചര്യവും മനസ്സിലാക്കാനും ലക്ഷ്യമിടുന്ന മീഡിയ ക്ലബുകള്‍വഴി ഗാന്ധിയന്‍ മൂല്യങ്ങള്‍ പ്രചരിപ്പിക്കുന്നതിനും പ്രത്യേക സംവിധാനം ഏര്‍പ്പെടുത്തുമെന്ന് അദ്ദേഹം വ്യക്തമാക്കി.
ഗാന്ധിജയന്തി വാരാഘോഷത്തോടനുബന്ധിച്ചുള്ള മത്സരങ്ങള്‍ ഉള്‍പ്പെടെ എല്ലാ പരിപാടികളും ഗാന്ധിജിയുടെ വ്യക്തിത്വത്തെ അടുത്തറിയാനുള്ള അവസരമെന്ന നിലയില്‍ വിദ്യാര്‍ഥികള്‍ പ്രയോജനപ്പെടുത്തണമെന്ന് ചടങ്ങില്‍ അധ്യക്ഷത വഹിച്ച അസിസ്റ്റന്റ് കലക്ടര്‍ അശാ അജിത്ത് പറഞ്ഞു.
ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പ് മേഖലാ ഡെപ്യൂട്ടി ഡയറക്ടര്‍ എന്‍ സുനില്‍കുമാര്‍, സെന്റര്‍ ഫോര്‍ ഗാന്ധിയന്‍ സ്റ്റഡീസ് ആന്റ് റിസര്‍ച്ച് സെക്രട്ടറി ജി.ആര്‍ കൃഷ്ണകുമാര്‍, ചിത്രകാരന്‍ ഷജിത്ത്, യൂത്ത് പ്രമോഷന്‍ കൗണ്‍സില്‍ ചെയര്‍മാന്‍ സുമന്‍ജിത്ത് മിഷ തുടങ്ങിയവര്‍ പങ്കെടുത്തു. ജില്ലാ ഇന്‍ഫര്‍മേഷന്‍ ഓഫീസര്‍ സി. അജോയ് സ്വാഗതവും അസിസ്റ്റന്റ് എഡിറ്റര്‍ ജസ്റ്റിന്‍ ജോസഫ് നന്ദിയും പറഞ്ഞു.