കൊല്ലം: എക്‌സൈസ് എന്‍ഫോഴ്‌സ്‌മെന്റ് ആന്റ് ആന്റി നാര്‍കോട്ടിക്ക് സ്‌പെഷ്യല്‍ സ്‌ക്വാഡ് നടത്തിയ റെയ്ഡില്‍ 35 പൊതി കഞ്ചാവുമായി യുവാവ് പിടിയിലായി. ചാത്തിനാംകുളം കൊടുവേലില്‍ വീട്ടില്‍ തലയന്‍ എന്നുവിളിക്കുന്ന ഷാനവാസ്(34) ആണ് അറസ്റ്റിലായത്.
ചാത്തിനാംകുളം പോക്കര്‍വിള കേന്ദ്രീകരിച്ച് യുവാക്കള്‍ കഞ്ചാവ് ഉപയോഗിക്കുന്നതായി പരാതി ലഭിച്ചതിനെ തുടര്‍ന്നാണ് എക്‌സൈസ് പരിശോധന നടത്തിയത്. ഇയാള്‍ മുന്‍പും കഞ്ചാവ് കേസുകളില്‍ ശിക്ഷയനുഭവിച്ചിട്ടുണ്ട്. തമിഴ്‌നാട്ടില്‍ നിന്നും ആഴ്ചയിലൊരിക്കല്‍ കഞ്ചാവ് വാങ്ങി പൊതി ഒന്നിന് 250 രൂപ നിരക്കിലാണ് വില്‍പ്പന നടത്തുന്നതെന്ന് പ്രതി സമ്മതിച്ചു. ഇയാള്‍ കഞ്ചാവ് വാങ്ങുന്ന സ്ഥലത്തെക്കുറിച്ച് അന്വേഷണം ആരംഭിച്ചതായി എക്‌സൈസ് വൃത്തങ്ങള്‍ അറിയിച്ചു. റെയ്ഡിന് സി.ഐ ജെ താജുദ്ദീന്‍കുട്ടി, എക്‌സൈസ് ഇന്‍സ്‌പെക്ടര്‍ എം കൃഷ്ണകുമാര്‍, പ്രിവന്റീവ് ഓഫിസര്‍ വിനോദ് ആര്‍.ബി, ഷാഡോ ടീം അംഗങ്ങളായ വിഷ്ണുരാജ്, സലിം, ദിലീപ് എന്നിവര്‍ നേതൃത്വം നല്‍കി.