ഊട്ടി: തമിഴ്‌നാട് ട്രാന്‍സ്‌പോര്‍ട്ട് കോര്‍പറേഷന്‍ ബസിന്റെ ഗ്ലാസ് എറിഞ്ഞ് തകര്‍ത്ത ട്രാന്‍സ്‌പോര്‍ട്ട് ഡ്രൈവറെ പൊലിസ് അറസ്റ്റു ചെയ്തു. കോയമ്പത്തൂര്‍ ഡിവിഷന്‍ ടി.എന്‍.എസ്.ടി.സി ഡിപ്പോ ഡ്രൈവര്‍ പൊങ്കാലിമട്ടം സ്വദേശി ശിവകുമാറി(38)നെയാണ് കുന്നൂര്‍ സി.ഐ ലക്ഷ്മണദാസ് അറസ്റ്റു ചെയ്തത്. മേട്ടുപാളയത്ത് നിന്ന് കുന്നൂരിലേക്ക് വരികയായിരുന്ന ബസില്‍ കയറിയ ഇയാള്‍ കണ്ടക്ടറുമായി വഴക്കിട്ടു. തുടര്‍ന്ന് വഴിമധ്യ ബര്‍ളിയാറില്‍ ഇയാളെ ബസില്‍ നിന്ന് ഇറക്കിവിടുകയായിരുന്നു. തുടര്‍ന്ന് മറ്റൊരു ബസില്‍ കുന്നൂരിലെത്തിയ ഇയാള്‍ ഇറക്കിവിട്ട ബസിന്റെ ഗ്ലാസ് എറിഞ്ഞ് തകര്‍ക്കുകയായിരുന്നു. കണ്ടക്ടര്‍ കുന്നൂര്‍ പൊലിസില്‍ നല്‍കിയ പരാതിയുടെ അടിസ്ഥാനത്തിലാണ് ഇയാളെ അറസ്റ്റു ചെയ്തത്.