കടുത്തുരുത്തി:വിചാരണ കഴിഞ്ഞ് കോടതിയില്‍ നിന്ന് തിരിച്ചു കൊണ്ടുപോകുന്നതിനിടെ പൊലിസിനെ വെട്ടിച്ച് കടന്ന പ്രതി പിടിയില്‍. നിരവധി കേസുകളിലെ പ്രതിയായ രാമപുരം കുന്നേല്‍ വിഷ്ണു പ്രശാന്ത്(25) ആണ് പിടിയിലായത്. തിങ്കളാഴ്ച രാത്രി 10.30ന് കടുത്തുരുത്തി- പാലാ റോഡില്‍  കാര്‍ തടഞ്ഞുനിര്‍ത്തി യാത്രക്കാരെ മര്‍ദിക്കുകയും കാറിന്റെ ചില്ലുകള്‍ എറിഞ്ഞ് തകര്‍ക്കുകയും ചെയ്ത കേസില്‍ പ്രതിയാണിയാള്‍. പൂഞ്ഞാര്‍ കുന്നോനി പൈങ്ങുളം പറമ്പില്‍ ബെന്നി ജോസഫ്(46) , ഭാര്യാസഹോദരന്‍ മോന്‍സി(42) എന്നിവര്‍ സഞ്ചരിച്ചിരുന്ന കാറാണ് പ്രതി തകര്‍ത്തത്.
പാല, രാമപുരം, ഗാന്ധിനഗര്‍, കോട്ടയം, ഏറ്റുമാനൂര്‍, തൃപ്പൂണിത്തറ തുടങ്ങി നിരവധി സ്റ്റേഷനുകളില്‍ വാഹനമോഷണം, അടിപിടി, മാലമോഷണം തുടങ്ങിയ കേസുകളില്‍ പ്രതിയാണ് വിഷ്ണുപ്രസാദ്. പാലയില്‍ നടന്ന പിടിച്ചുപറി കേസില്‍ അറസ്റ്റിലായ പ്രതിയെ തിരിവനന്തപുരം സെന്‍ട്രല്‍ ജയിലില്‍ നിന്നും വിചാരണയ്ക്ക് കൊണ്ടുവരുമ്പോഴാണ് ഇയാള്‍ രക്ഷപ്പെട്ടത്.