കോഴിക്കോട്: മന്ത്രിമാരുടെയും നേതാക്കളുടെയും ബന്ധുക്കള്‍ക്ക് സര്‍ക്കാര്‍ തസ്തികയില്‍ നിയമനം നല്‍കിയ വിവാദം ആളിക്കത്തുന്നതിനിടെ രക്തസാക്ഷിയുടെ കുടുംബത്തെ പാര്‍ട്ടി വഞ്ചിച്ചെന്ന തുറന്നുപറച്ചിലുമായി മകന്‍ രംഗത്തെത്തിയത് സി.പി.എമ്മിനെ പ്രതിസന്ധിയിലാക്കി. മേപ്പയ്യൂരിലെ രക്തസാക്ഷി ഇടത്തില്‍ ഇബ്രാഹിമിന്റെ കുടുംബത്തോട് ജോലി നല്‍കാമെന്ന് പറഞ്ഞ് പറ്റിച്ച കാര്യം ചൂണ്ടിക്കാട്ടി മകന്‍ ഷെബിന്‍ ഫെയ്‌സ്ബുക്കില്‍ പോസ്റ്റ് ചെയ്ത കുറിപ്പ് പാര്‍ട്ടി നേതൃത്വത്തിന് തലവേദനയായിരിക്കുകയാണ്. പോസ്റ്റ് സോഷ്യല്‍ മീഡിയയില്‍ നിറഞ്ഞുനില്‍ക്കുന്നതോടെ മറുപടിയില്ലാതെ കുഴങ്ങുകയാണ് നേതാക്കള്‍. 1987ല്‍ ആര്‍.എസ്.എസുകാരാണ് ഇബ്രാഹിമിനെ കൊല്ലപ്പെടുത്തിയത്. അന്ന് മുതല്‍ പാര്‍ട്ടി രക്തസാക്ഷിയായി ഇബ്രാഹിമിനെ അവതരിപ്പിക്കുമ്പോഴും വര്‍ഷം തോറും രക്തസാക്ഷിദിനം ആചരിക്കുമ്പോഴും കുടുംബത്തെ തിരിഞ്ഞുനോക്കാറില്ലെന്ന പരാതിയാണ് മകന്‍ ഉന്നയിക്കുന്നത്.
'രക്തസാക്ഷിയുടെ കുടുംബത്തോട് സി.പി.എമ്മിന്റെ നിലപാട് കാണുമ്പോള്‍ പാര്‍ട്ടിയോട് പുച്ഛം തോന്നുന്നു. ഈ പാര്‍ട്ടിക്കു വേണ്ടിയല്ലേ ബാപ്പയുടെ വലിയ ജീവന്‍ കൊടുത്തതെന്ന് ആലോചിക്കുമ്പോള്‍ പുച്ഛത്തിന്റെ അളവ് കൂടുകയാണ് ' ഇങ്ങനെ തുടരുന്നു ഷെബിന്റെ ഫെയ്‌സ്ബുക്ക് പോസ്റ്റ്. മേപ്പയ്യൂര്‍ സര്‍വിസ് സഹകരണ ബാങ്കില്‍ ഇബ്രാഹിമിന്റെ മക്കള്‍ക്ക് ജോലി നല്‍കാമെന്ന് പറഞ്ഞ് സി.പി.എം നേതാക്കള്‍ വഞ്ചിച്ചതായി രക്തസാക്ഷിയുടെ മകന്‍ പറയുന്നു. മന്ത്രിമാര്‍ ബന്ധുക്കള്‍ക്ക് ജോലി നല്‍കാന്‍ വളഞ്ഞവഴി സ്വീകരിക്കുമ്പോഴാണ് പാര്‍ട്ടിക്കുവേണ്ടി ജീവത്യാഗം ചെയ്ത രക്തസാക്ഷിയുടെ കുടുംബത്തെ വിസ്മരിക്കുന്നത്. പലതവണ ബാങ്കില്‍ നിയമനം നടന്നിട്ടും ഇബ്രാഹിമിന്റെ മക്കള്‍ക്കു മാത്രം നിയമനം ലഭിച്ചില്ല. ഇനി പാര്‍ട്ടിയുടെ ഔദാര്യം വേണ്ടെന്നും പോസ്റ്റില്‍ മകന്‍ തുറന്നു പറയുന്നുണ്ട്.
 'ബാപ്പ കച്ചവടം ചെയ്ത സ്വന്തം പീടിക 1988-ല്‍ പാര്‍ട്ടി ഇടപെട്ട് മറ്റൊരാള്‍ക്ക് വാടകക്ക് നല്‍കിയിരുന്നു. ഈ ഘട്ടത്തില്‍ കുടുംബത്തിന് പാര്‍ട്ടി നല്‍കിയ വാഗ്ദാനങ്ങളൊന്നും പാലിക്കപ്പെട്ടില്ല. അണികള്‍ ഗതികേടുകൊണ്ട് നല്‍കിയ സ്ഥാനത്ത് ഞെളിഞ്ഞിരിക്കുമ്പോള്‍ ഇടക്ക് താഴേത്തട്ടിലേക്ക് നോക്കുന്നത് നിങ്ങളുടെ നിലനില്‍പ്പിന് നല്ലതാണ്. ബാപ്പയെ സ്‌നേഹിക്കുന്ന ജനങ്ങള്‍ക്ക് ഇതെല്ലാം അറിയാം. നിങ്ങളുടെ ഔദാര്യം ഇനി ആവശ്യമില്ല. ആ പണിയും വേണ്ട. ഇരന്നു തിന്നാന്‍ ഞങ്ങളെ കിട്ടില്ല. നാലാള് കൂടുമ്പോള്‍ മൈക്ക് കൈയില്‍ കിട്ടിയാല്‍ ഈ കുടുംബത്തെ തങ്ങള്‍ സംരക്ഷിക്കുമെന്ന് മേലാല്‍ പറഞ്ഞുപോകരുത് ' എന്ന മുന്നറിയിപ്പും പോസ്റ്റിലുണ്ട്. പോസ്റ്റ് ചര്‍ച്ചയായതോടെ മുഖം രക്ഷിക്കാനാവാതെ കുഴങ്ങുകയാണ് സി.പി.എമ്മിന്റെ പ്രാദേശിക നേതൃത്വവും ജില്ലാ നേതൃത്വവും.