ഊട്ടി: നഗരത്തില്‍ സ്ഥാപിച്ച ഭീമന്‍ ഫ്‌ളക്‌സ് ബോര്‍ഡുകള്‍ ഭീഷണിയാവുന്നു. നഗരത്തിന്റെ വിവിധ ഭാഗങ്ങളില്‍ ഗതാഗത തടസത്തിന് കാരണമാകും വിധമാണ് പലരും ബോര്‍ഡുകള്‍ സ്ഥാപിച്ചിരിക്കുന്നത്. ഡ്രൈവര്‍മാരെയാണ് ഇത് കാര്യമായി ബാധിച്ചിരിക്കുന്നത്.
രാഷ്ട്രീയ പാര്‍ട്ടികളുടെയും മറ്റും ബോര്‍ഡുകളാണ് അധികവും. വാഹനങ്ങള്‍ക്ക് ഭീഷണിയാകും വിധത്തിലുള്ള ബോര്‍ഡുകള്‍ സ്ഥാപിക്കരുതെന്ന ചെന്നൈ ഹൈക്കോടതി ഉത്തരവ് നിലനില്‍ക്കെയാണ് ഇത്തരത്തില്‍ ബോര്‍ഡുകള്‍ സ്ഥാപിച്ചിരിക്കുന്നത്. ഇതിനെതിരേ അധികൃതരുടെ ഭാഗത്ത് നിന്ന് അടിയന്തര നടപടി ഉണ്ടാകണമെന്നാണ് യാത്രക്കാരുടെയും നാട്ടുകാരുടെയും ആവശ്യം.