പൊന്നാനി: നിരവധി കേസുകളിലെ പിടികിട്ടാപുള്ളിയും കുപ്രസിദ്ധ ഗുണ്ടയുമായ പ്രതിയെ പൊന്നാനി പൊലിസ് അറസ്റ്റ് ചെയ്തു. വെളിയങ്കോട് തണ്ടാം കൊള്ളി മനാഫി (42) നെയാണ് ഇന്നലെ പിടികൂടിയത്. 2004 ല്‍ വെളിയങ്കോട് സ്വദേശി അബ്ദുല്ലയുടെ വീട്ടില്‍ അതിക്രമിച്ചു കയറി സി.പി.എം പ്രവര്‍ത്തകനായ പരാതിക്കാരനെയും സഹോദരിയെയും വടിവാള്‍കൊണ്ടു വെട്ടിക്കൊലപ്പെടുത്താന്‍ ശ്രമിച്ച കേസിലാണ് ഇയാള്‍ അറസ്റ്റിലായത്.
നേരത്തേ കേസന്വേഷണ സമയത്ത് അറസ്റ്റിലായിരുന്ന ഇയാള്‍ കോടതിയില്‍നിന്നു ജാമ്യമെടുത്തു വിദേശത്തേക്കു മുങ്ങുകയായിരുന്നു. അടുത്തിടെ ലീവിന് നാട്ടില്‍വന്നപ്പോള്‍ ലഭിച്ച രഹസ്യവിവരത്തിന്റെ അടിസ്ഥാനത്തിലാണ് അറസ്റ്റ്.
പൊലിസ് വീട്ടിലെത്തിയപ്പോള്‍ പേരു മാറ്റിപ്പറഞ്ഞു രക്ഷപ്പെടാന്‍ ഇയാള്‍ ശ്രമിച്ചെങ്കിലും വിശദമായ അന്വേഷണത്തില്‍ കുടുങ്ങുകയായിരുന്നു.
പൊലിസുകാരായ ഉദയന്‍, അനീഷ് പീറ്റര്‍ എന്നിവര്‍ പ്രതിയെ പിടികൂടുന്നതിന് സി.ഐയെ സഹായിച്ചു.