തിരുവനന്തപുരം:ഭരണ ഭാഷാ വര്‍ഷാഘോഷം 2016 നവംബര്‍ ഒന്നുമുതല്‍ 2017 ഒക്ടോബര്‍ 31 വരെ ഒരു വര്‍ഷത്തേക്ക് കൂടി ദീര്‍ഘിപ്പിച്ച് ഉത്തരവായി.
ഈ കാലയളവില്‍ പ്രത്യേക കര്‍മപരിപാടി തയാറാക്കി ഭാഷാമാറ്റ പ്രവര്‍ത്തനങ്ങള്‍ തുടരണമെന്ന് സെക്രട്ടേറിയറ്റിലേതുള്‍പ്പെടെ എല്ലാ സര്‍ക്കാര്‍ വകുപ്പുകള്‍ക്കും കലക്ടറേറ്റുകള്‍ക്കും സര്‍ക്കാര്‍ നിയന്ത്രണത്തിലുള്ള പൊതുമേഖലാ അര്‍ധ സര്‍ക്കാര്‍ സ്വയംഭരണ സഹകരണ സ്ഥാപനങ്ങള്‍ക്കും സര്‍ക്കാര്‍ നിര്‍ദേശം നല്‍കി. ഔദ്യോഗിക ഭാഷ സംബന്ധിച്ച് സര്‍ക്കാര്‍ പുറപ്പെടുവിച്ചുവരുന്ന ഉത്തരവുകളും നിര്‍ദേശങ്ങളും കര്‍ശനമായി പാലിക്കാനും ഭരണഭാഷ മാതൃഭാഷയിലാണെന്ന് ഉറപ്പ് വരുത്താനുമുള്ള നടപടി സ്വീകരിക്കണം. നടപടി റിപ്പോര്‍ട്ട് ഉദ്യോഗസ്ഥ ഭരണപരിഷ്‌കാര(ഔദ്യോഗിക ഭാഷ) വകുപ്പില്‍ ലഭ്യമാക്കണമെന്നും നിര്‍ദേശം നല്‍കിയിട്ടുണ്ട്.