കൊണ്ടോട്ടി: സാങ്കേതികത ഉപയോഗിച്ചു വിദ്യാഭ്യാസ നിലവാരം വര്‍ധിപ്പിക്കാന്‍ സാധിച്ചില്ലെങ്കില്‍  വ്യാജവിദ്യാഭ്യാസത്തിന്റെ ഹബ്ബായി കേരളം മാറുമെന്നു സ്പീക്കര്‍ പി. ശ്രീരാമകൃഷ്ണന്‍. പുളിക്കല്‍ എ.എം.എം.എച്ച്.എസില്‍ മാത്സ് ലാബിന്റെ ഉദ്ഘാടനം നിര്‍വഹിക്കുകയായിരുന്നു അദ്ദേഹം.
വിവരങ്ങള്‍ വിജ്ഞാനങ്ങളാക്കി മാറ്റുന്നതിന്റെ കേന്ദ്രങ്ങളായി സ്‌കൂളുകള്‍ മാറണം. വിദ്യാഭ്യാസരംഗത്തു വലിയ രീതിയിലുളള മാറ്റങ്ങളാണു സംഭവിക്കുന്നത്. ആ മാറ്റങ്ങള്‍ ശരിയായ രീതിയില്‍ ഉപയോഗിക്കാനാകണമെന്നും അദ്ദേഹം പറഞ്ഞു.
പുതുതായി നിര്‍മ്മിച്ച ലൈബ്രറിയുടെ ഉദ്ഘാടനം ഇ.അഹമ്മദ് എം.പി നിര്‍വഹിച്ചു. ചടങ്ങില്‍ ടി.വി. ഇബ്രാഹീം എം.എല്‍.എ അധ്യക്ഷനായി. ഉപവിദ്യാഭ്യാസ ഡയറക്ടര്‍ പി. സഫറുല്ല കിഡ്‌നി ഫണ്ട് ഏറ്റുവാങ്ങി.
കവാക്കിബുന്നയ്യിറ സംഘം പ്രസിഡന്റ് പി.പി. മൂസ, സെക്രട്ടറി പി.സി. മുഹമ്മദ് മാസ്റ്റര്‍, സ്‌കൂള്‍ മാനേജര്‍ പി.ഡി. ഹനീഫ, ബ്ലോക്ക് പഞ്ചായത്ത് വൈസ് പ്രസിഡന്റ് എ. അബ്ദുല്‍ കരീം, പുളിക്കല്‍ ഗ്രാമപഞ്ചായത്ത് പ്രസിഡന്റ് സുനീറ അബ്ദുല്‍ വഹാബ്, ജില്ലാ പഞ്ചായത്തംഗം സറീന ഹസീബ്, എന്‍. പ്രമോദ് ദാസ്, അഡ്വ. കെ.കെ. സമദ്, നസീം പുളിക്കല്‍, പി.എന്‍. മുഹമ്മദ് അബ്ദുറഹ്മാന്‍ എന്നിവര്‍ സംബന്ധിച്ചു.
ഗണിതലാബ് ഡയറക്ടര്‍ വി.ആര്‍. അജയകുമാര്‍, ലൈബ്രേറിയന്‍ കെ. നൗഷാദ് എന്നിവരെ ചടങ്ങില്‍ ആദരിച്ചു. പി.ടി.എ പ്രസിഡന്റ് എന്‍.കെ.എസ്. യസീദ് കോയ തങ്ങള്‍ സ്വാഗതവും പ്രധാനാധ്യാപിക കെ. ശോഭന നന്ദിയും പറഞ്ഞു.