കൊല്ലം: കന്നുകാലി ഇന്‍ഷുറന്‍സ് പുനരാരംഭിക്കുന്നതിന്റെ ഭാഗമായി ഈ സാമ്പത്തികവര്‍ഷം ഒരുലക്ഷം പശുക്കളെ ഇന്‍ഷ്വര്‍ ചെയ്യാന്‍ നടപടി സ്വീകരിക്കുമെന്ന് മന്ത്രി കെ .രാജു പറഞ്ഞു. മില്‍മയുടെ കൊല്ലം ഡയറിയില്‍ ഐ.എസ്.ഒ സര്‍ട്ടിഫിക്കേഷന്‍ പ്രഖ്യാപനം നിര്‍വ്വഹിച്ച് സംസാരിക്കുകയായിരുന്നു അദ്ദേഹം.
ഇന്‍ഷുറന്‍സ് പ്രീമിയത്തില്‍ പകുതി ക്ഷീരകര്‍ഷകന്‍ വഹിക്കണം. ബാക്കിയുള്ള അമ്പത് ശതമാനത്തില്‍ പകുതി തദ്ദേശസ്വയംഭരണ സ്ഥാപനങ്ങളും പകുതി സര്‍ക്കാരും വഹിക്കും. സംസ്ഥാനത്തിനാവശ്യമായ പാലിന്റെ 75 ശതമാനവും ഇപ്പോള്‍ തദ്ദേശീയമായി ഉല്‍പാദിപ്പിക്കുകയാണ്. 25 ശതമാനം അന്യസംസ്ഥാനങ്ങളില്‍ നിന്നാണ് എത്തുന്നത്. രണ്ടുവര്‍ഷം കൊണ്ട് കേരളത്തിനാവശ്യമായ പാല്‍ ഇവിടെത്തന്നെ ഉല്‍പാദിപ്പിക്കാനാണ് സര്‍ക്കാര്‍ ലക്ഷ്യമിടുന്നതെന്നും മന്ത്രി പറഞ്ഞു.
ബല്‍ക്ക് മില്‍ക്ക് വെന്‍ഡിങ് യൂനിറ്റിന്റെ ഉദ്ഘാടനം മേയര്‍ വി രാജേന്ദ്രബാബു നിര്‍വ്വഹിച്ചു.
എന്‍. കെ പ്രേമചന്ദ്രന്‍ എം.പി മുഖ്യപ്രഭാഷണം നടത്തി. മില്‍മ ചെയര്‍മാന്‍ പി .ടി. ഗോപാലകുറുപ്പ് അധ്യക്ഷനായി.
തിരുവനന്തപുരം മേഖലാ ചെയര്‍മാന്‍ കല്ലട രമേശ്, മാനേജിങ് ഡയറക്ടര്‍ കെ ആര്‍ സുരേഷ് ചന്ദ്രന്‍, ജോണ്‍ ജേക്കബ് വള്ളക്കാലില്‍, കൊല്ലം ഡയറി മാനേജര്‍ ടി ശ്രീനിവാസ് തുടങ്ങിയവര്‍ സംബന്ധിച്ചു.