പട്ടാമ്പി: സോഷ്യല്‍മീഡിയകള്‍ വഴി വ്യാപകമായി പ്രചരിപ്പിച്ച് കൊണ്ടിരിക്കുന്ന വ്യാജ കോഴിമുട്ട, ഇറച്ചി കോഴികളിലെ രോഗം തുടങ്ങിയ സന്ദേശങ്ങളിലെ ആശങ്കകള്‍ക്ക് അറുതിവരുത്താനാകാതെ പൊതുജനം. ഇതുസംബന്ധിച്ച് ബന്ധപ്പെട്ടവര്‍ മുന്നറിയിപ്പ് നല്‍കിയിട്ടുണ്ടെങ്കിലും കടകളില്‍ വരുന്ന കോഴിമുട്ടകളുടെ പുറം തോട് വെള്ളകളറിന് പകരം ചാരകളറുള്ള പുറം തോടുള്ള മുട്ടകളാണ് വില്‍പന നടത്തുന്നത്. എന്നാല്‍ ഇത് പ്രത്യേകമായി വളര്‍ത്തുന്ന കോഴികളുടെ മുട്ടകളാണന്ന് പറഞ്ഞ് കുടില്‍വ്യവസായ രീതിയില്‍ വിപണനം നടത്തുന്നതാണന്ന് വ്യാപാരികള്‍ ഇതുസംബന്ധിച്ച് നല്‍കുന്ന മറുപടി. എന്നാല്‍ ചിലയിടങ്ങളില്‍ ചൈനീസ് മുട്ട എന്ന പേരിലാണ് വിപണനം നടക്കുന്നത്.
അതെ സമയം സോഷ്യല്‍മീഡിയ വഴി പ്രചരിക്കുന്ന സന്ദേശങ്ങള്‍ പൊതുജനത്തെ വട്ടം കറക്കുകയും ചെയ്യുന്നു. ഇറച്ചി കോഴികളിലും സമാന രീതിയിലുള്ള സന്ദേശങ്ങള്‍ വര്‍ധിച്ചിട്ടുണ്ട്.
പാലക്കാട് ജില്ലക്കാരുടെ ശ്രദ്ധക്ക് എന്ന രൂപത്തില്‍ വരുന്ന കുറിപ്പുകളില്‍ ചെര്‍പ്പുളശ്ശേരി, തൃക്കടീരി, തുടങ്ങിയ പ്രദേശങ്ങളില്‍ ഇറക്കുമതി ചെയ്ത കോഴികള്‍ രോഗം ബാധിച്ചവയാണന്ന ഉളളടക്കങ്ങളാണ് ആശങ്കകള്‍ക്ക് വഴി വെക്കുന്നത്.