കാസര്‍കോട്: ഡല്‍ഹി പരിവര്‍ത്തന്‍ ജന്‍ കല്യാണ്‍ സമിതിയുടെ ഹിന്ദിജ്ഞാന രത്‌ന അവാര്‍ഡിന് കേന്ദ്ര സര്‍വകലാശാലയിലെ ഭരണഭാഷാവിഭാഗം അസിസ്റ്റന്റ് ഡയറക്ടര്‍ ഡോ.ടി.കെ.അനീഷ്‌കുമാര്‍ അര്‍ഹനായി. കേന്ദ്ര സര്‍ക്കാര്‍ ഓഫിസുകളില്‍ സര്‍ക്കാരിന്റെ ഭരണഭാഷാ നയം നടപ്പില്‍വരുത്തുന്നതിന് നടത്തിയ സേവനത്തെ മുന്‍നിര്‍ത്തിയാണ് അവാര്‍ഡ്. ഗോവയില്‍ നടന്ന അഖില ഭാരതഹിന്ദി സമ്മേളനത്തില്‍വച്ച് നോയിഡയിലെ ദേശീയ കാലാവസ്ഥാ പ്രവചന കേന്ദ്രം അഡ്മിനിസ്‌ട്രേറ്റിവ് ഡയറക്ടര്‍ നിര്‍മ്മല്‍ കുമാര്‍ ഭഗത് അവാര്‍ഡ് കൈമാറി. എയര്‍ ഇന്ത്യയുടെ ഭരണഭാഷാ വിഭാഗത്തില്‍ സേവനമനുഷ്ഠിച്ചിരുന്ന ഡോ. അനീഷ്‌കുമാര്‍ നാലുവര്‍ഷം മുന്‍പാണ് കാസര്‍കോട് കേന്ദ്ര സര്‍വകലാശാലയില്‍ അസിസ്റ്റന്റ് ഡയറക്ടറായി ചുമതലയേറ്റത്. സര്‍വകലാശാല മീഡിയാ റിലേഷന്‍സ് ഓഫിസര്‍കൂടിയായ ഡോ. അനീഷ്‌കുമാര്‍ കോട്ടയം ജില്ലയിലെ വൈക്കം സ്വദേശിയാണ്.