അധികൃതരുടെ നിസംഗത മുതലെടുത്ത് കെട്ടിടം സാമൂഹ്യവിരുദ്ധര്‍ കൈയടക്കി
എടപ്പാള്‍: ഒരു കാലത്ത് അക്ഷരപ്രേമികളുടെ ഇടത്താവളമായിരുന്ന വട്ടംകുളം കുറ്റിപ്പാലയിലെ വായനശാലാ കെട്ടിടം കാടുകയറി നശിക്കുന്നു. വട്ടംകുളം പഞ്ചായത്തിലെ ഏഴാം വാര്‍ഡില്‍പ്പെടുന്ന സരസ്വതി വിലാസം സ്‌കൂളിന് സമീപത്താണ് രണ്ടുപതിറ്റാണ്ട് മുന്‍പ് ഒരുകൂട്ടം അക്ഷരപ്രേമികളുടെ നേതൃത്വത്തില്‍ വായനശാല ആരംഭിച്ചത്.
ആ കൊലഘട്ടത്തില്‍ തന്നെ പ്രവര്‍ത്തകരുടെ നേതൃത്വത്തില്‍ സ്വന്തമായി ആറുസെന്റ് സ്ഥലം വാങ്ങി അതില്‍ കെട്ടിടവും നിര്‍മിച്ചു. തുടര്‍ന്ന് വായനശാലയിലേക്കാവശ്യമായ പുസ്തകങ്ങളും ശേഖരിച്ചു. തുടക്കത്തില്‍ ഒട്ടേറെപ്പേര്‍ ഈ വായനശാലയില്‍ അംഗങ്ങളായിരുന്നുവെങ്കിലും പിന്നീട് പലരും ഔദ്യോഗിക തിരക്കുകള്‍മൂലം പിന്‍വാങ്ങി. ഇതോടെ വായനശാലയുടെ പ്രവര്‍ത്തനവും നിലച്ചുതുടങ്ങി. നിലവില്‍ കാടുകയറിയ സ്ഥലവും കെട്ടിടവും സാമൂഹികവിരുദ്ധരുടെ താവളമാണ്. ഇപ്പോള്‍ കിലോമീറ്ററുകള്‍ അകലെയാണു മറ്റൊരു വായനശാലയുള്ളത്. ഈ വായനശാലക്കാകട്ടെ സ്വന്തമായി കെട്ടിടമോ മറ്റു സൗകര്യങ്ങളോ ഇല്ല.
പഞ്ചായത്ത് അധികൃതര്‍ മുന്‍കയെടുത്ത്  തകര്‍ന്ന വായനശാലയുടെ അറ്റകുറ്റപ്പണികള്‍ നടത്തുകയും വാടകകെട്ടിടത്തില്‍ പ്രവര്‍ത്തിക്കുന്ന വായനശാല ഇവിടേക്കു മാറ്റുകയും ചെയ്യണമെന്നാണ് നാട്ടുകാര്‍ ആവശ്യപ്പെടുന്നത്.