കാസര്‍കോട്: ശീതളപാനീയത്തില്‍ മാലിന്യം കലര്‍ന്നിട്ടുണ്ടെന്ന പരാതിയുടെ അടിസ്ഥാനത്തില്‍ ആരോഗ്യവകുപ്പ് അധികൃതര്‍ നടത്തിയ പരിശോധനയില്‍ മാലിന്യം കലര്‍ന്ന പാനീയ ശേഖരം കണ്ടെത്തി. മൊഗ്രാല്‍ പുത്തൂരില്‍ ഒരു വര്‍ക്ക്‌ഷോപ്പില്‍ നടന്ന ഒരു ചടങ്ങില്‍ വിതരണം ചെയ്ത ശീതളപാനീയത്തിലാണ് മാലിന്യം കണ്ടെത്തിയത്. ഇതേകുറിച്ച് പരാതി ലഭിച്ചതിനെ തുടര്‍ന്ന് ഹെല്‍ത്ത് ഇന്‍സ്‌പെക്ടര്‍ ബി. അഷ്‌റഫ്, ജൂനിയര്‍ ഹെല്‍ത്ത് ഇന്‍സ്‌പെക്ടര്‍ കെ. ജയറാം എന്നിവരുടെ നേതൃത്വത്തില്‍ നടത്തിയ പരിശോധനയില്‍ 50 ഓളം കുപ്പികള്‍ പിടിച്ചെടുത്തു. ഒരു വ്യാപാര സ്ഥാപനത്തില്‍ നിന്നും പിടിച്ചെടുത്ത ശീതളപാനീയ ശേഖരം ഫുഡ് സേഫ്റ്റി വിഭാഗത്തിന് കൈമാറി. മഞ്ചേശ്വരത്തെ ഒരു വ്യാപാര സ്ഥാപനത്തില്‍ നിന്നാണ് മാലിന്യമടങ്ങിയ ശീതളപാനീയ ശേഖരം പിടികൂടിയത്. കൂടുതല്‍ പരിശോധനകള്‍ക്ക് ശേഷം മാത്രമേ ഏതു രീതിയിലുള്ള മാലിന്യമാണ് ശീതളപാനീയത്തില്‍ അടങ്ങിയിട്ടുള്ളതെന്ന് മനസ്സിലാവുകയുള്ളൂവെന്ന് ആരോഗ്യ വകുപ്പ് അധികൃതര്‍ പറഞ്ഞു.