മുക്കം: എം.എ.എം.ഒ കോളജില്‍ വോട്ടിങ് കേന്ദ്രത്തില്‍ അധ്യാപകന്‍ ബാലറ്റ് പേപ്പര്‍ തിരിമറി നടത്തിയതായി ആരോപണം. കൗണ്ടിങ് നടത്തിയ അധ്യാപകന്റെ പോക്കറ്റില്‍ നിന്നും എം.എസ്.എഫ് സ്ഥാനാര്‍ഥിക്കു അനുകൂലമായി വോട്ടു രേഖപ്പെടുത്തിയ ബാലറ്റ് പേപ്പര്‍ കണ്ടെത്തിയാതായും കൗണ്ടിങ്ങില്‍ ആദ്യം ജയിച്ച സ്ഥാനാര്‍ഥി പിന്നീട് പരാജയപ്പെടുകയും പരാജയപ്പെട്ടയാള്‍ വിജയിക്കുകയും ചെയ്തത് തിരിമറി മൂലമാണന്നും എം.എസ്.എഫ് നേതാക്കള്‍ പറഞ്ഞു.
അനുമതിയോട് കൂടി പ്രചാരണത്തിനിറങ്ങിയ അഞ്ചു വിദ്യാര്‍ഥികളെ ഇതേ അധ്യാപകന്‍ മുമ്പ് ക്ലാസില്‍ നിന്നും പുറത്താക്കിയിരുന്നു. ഈ നടപടിക്ക് പ്രിന്‍സിപ്പല്‍ കൂട്ടുനില്‍ക്കുന്നതായും എം.എസ്.എഫ് നേതാക്കള്‍ ആരോപിച്ചു.
കൂടാതെ കൗണ്ടിങ് സമയത്ത് കോളജ് വിദ്യാര്‍ഥി അല്ലാത്ത എസ്.എഫ്.ഐ നേതാവ് കോളജില്‍ കയറിയത് സി.സി.ടി.വി പരിശോധന നടത്തണമെന്നും തിരിമറി കണ്ടെത്തിയ സാഹചര്യത്തില്‍ ശക്തമായ നടപടി സ്വീകരിക്കണമെന്നും റീ ഇലക്ഷന്‍ നടത്തണമെന്നും ആവശ്യപ്പെട്ടുകൊണ്ട് എം.എസ്.എഫ് അനിശ്ചിതകാല സമരത്തിന് ആഹ്വാനം ചെയ്തു. മണ്ഡലം പ്രസിഡന്റ് കെ.വി നിയാസ് അധ്യക്ഷനായി. ജന:സെക്രട്ടറി എം ടി മുഹ്‌സിന്‍, കെ.പി ഷാജുറഹ്മാന്‍,കെ.സി ശിഹാബ് ,സി പി റിയാസ് , സിദ്ധീഖ് കോടഞ്ചേരി സംസാരിച്ചു.