വടകര: ജെ.ടി റോഡ് റെയില്‍പാളത്തിനു സമീപം വീടുകളോടു ചേര്‍ന്ന പഴയ ഷെഡിനകത്തു പ്ലാസ്റ്റിക് മാലിന്യം തള്ളാനുള്ള നഗരസഭ അധികൃതരുടെ നീക്കം പരിസരവാസികള്‍ തടഞ്ഞു. വിവിധ വാര്‍ഡുകളില്‍ നിന്നു ശേഖരിച്ച മാലിന്യം വാഹനത്തില്‍ കയറ്റി ഇവിടെ തള്ളാനുള്ള ശ്രമമാണ് നാട്ടുകാര്‍ തടഞ്ഞത്.
മുന്‍പ് ഫയര്‍‌സ്റ്റേഷനും പിന്നീട് കെ.എസ്.ആര്‍.ടി.സി വര്‍ക്ക്‌ഷോപ്പും പ്രവര്‍ത്തിച്ച ഷെഡ് നഗരസഭയുടെ അധീനതയിലാണുള്ളത്. ഇവിടെയാണ് നഗരസഭാ ഓഫിസ് വളപ്പില്‍ സൂക്ഷിച്ച പ്ലാസ്റ്റിക് മാലിന്യം തള്ളാന്‍ കണ്ടിജന്‍സി ജീവനക്കാര്‍ എത്തിയത്. കഴുകി വൃത്തിയാക്കിയ പ്ലാസ്റ്റിക് സഞ്ചികളാണെന്ന് അധികൃതര്‍ വിശദീകരിച്ചെങ്കിലും നാട്ടുകാര്‍ അംഗീകരിച്ചില്ല.
ദുര്‍ഗന്ധം പരക്കുന്ന മാലിന്യങ്ങളാണ് തള്ളാന്‍ കൊണ്ടുവന്നതെന്ന് പരിസരവാസികള്‍ പറയുന്നു. റീസൈക്ലിങ് യൂനിറ്റിലേക്കു കൊണ്ടുപോകുന്നതിനു കാലതാമസം നേരിട്ടതിനാല്‍ കുറച്ചു ദിവസത്തേക്കു സൂക്ഷിക്കാനാണ് ഇവിടേക്കു എത്തിച്ചതെന്നാണ് അധികൃതര്‍ പറയുന്നത്.