വടകര : എസ്.എസ്.എല്‍.സി പരീക്ഷയില്‍ ഉന്നതവിജയം നേടാന്‍ വിദ്യാര്‍ഥികളെ സഹായിക്കാന്‍ പൂര്‍വവിദ്യാര്‍ഥികള്‍ രംഗത്ത്.
വടകര എം.യു.എം ഹയര്‍ സെക്കന്‍ഡറി സ്‌കൂളിലെ 1987-88 എസ്.എസ്.എല്‍.സി ബാച്ചാണ് വിജയ സോപാനം എന്ന പേരില്‍ കര്‍മപദ്ധതിയുമായി രംഗത്തു വന്നത്. 2017 മാര്‍ച്ചില്‍ പരീക്ഷയെഴുതുന്ന മുഴുവന്‍ വിദ്യാര്‍ഥികളെയും വിജയപ്പിക്കുന്നതിനായി അധ്യാപകര്‍ക്കു പിന്തുണ നല്‍കുക, 25 കുട്ടികളെങ്കിലും എല്ലാ വിഷയത്തിലും എ പ്ലസ് നേട്ടം കൈവരിക്കുന്നതിനു അക്കാദമികവും ഭൗതികവുമായ വിഭവ ലഭ്യത ഉറപ്പാക്കുക, പ്രത്യേക പരിഗണന അര്‍ഹിക്കുന്ന വിദ്യാര്‍ഥികള്‍ക്കും ഉന്നതവിജയം പ്രതീക്ഷിക്കുന്ന വിദ്യാര്‍ത്ഥികള്‍ക്കും പ്രത്യേക കോച്ചിങ് സംവിധാനങ്ങള്‍ ഒരുക്കുക തുടങ്ങിയ പ്രവര്‍ത്തനങ്ങളാണ് ആവിഷ്‌കരിച്ചിരിക്കുന്നത്.
അധ്യാപകര്‍ നിദേശിക്കുന്ന തിരഞ്ഞെടുത്ത വിദ്യാര്‍ഥികള്‍ക്ക് പഠനസാമഗ്രികള്‍, ഗൈഡുകള്‍, ചോദ്യശേഖരങ്ങള്‍, പരിശീലന ക്ലാസുകള്‍, ഗസ്റ്റ് ഫാക്കല്‍ട്ടീസ്, സ്‌കോളര്‍ഷിപ്പുകള്‍, പ്രോത്സാഹനങ്ങള്‍ എന്നിവ ഉറപ്പുവരുത്തും.
വിദ്യാര്‍ഥികള്‍ക്കു കൗണ്‍സിലിങ്, കരിയര്‍ ഗൈഡന്‍സ് ക്ലാസുകളും ലഭ്യമാക്കും. പ്രധാനാധ്യാപകരായ എന്‍. മൂസകുട്ടി, കെ സജീവ്കുമാര്‍ തുടങ്ങിയ അഞ്ചംഗ ഉപദേശക സമിതിയുടെ നിര്‍ദേശങ്ങളുടെ അടിസ്ഥാനത്തിലായിരിക്കും പൂര്‍വവിദ്യാര്‍ഥി കമ്മിറ്റി പ്രവര്‍ത്തിക്കുക.
ഷബീര്‍ വി കണ്‍വീനറും അന്‍വര്‍ ടി.എന്‍ ജോയിന്റ് കണ്‍വീനറുമാണ്.