കല്‍പ്പറ്റ: യൂനിയന്‍ തെരഞ്ഞെടുപ്പിനെ തുടര്‍ന്ന് കല്‍പ്പറ്റ ഗവ. കോളജില്‍ സംഘര്‍ഷം. സംഘര്‍ഷത്തില്‍ ഏഴുപേര്‍ക്കു പരുക്കേറ്റു. എസ്.എഫ്.ഐ യൂനിറ്റ് സെക്രട്ടറി അവിശിത്ത്, സുഭിലാഷ്, ആഷിക് എന്നിവര്‍ക്കും നാല് യു.ഡി.എസ്.എഫ് പ്രവര്‍ത്തകര്‍ക്കുമാണു പരുക്കേറ്റത്. ഇവരില്‍ ആറുപേരെ കല്‍പ്പറ്റ ജനറല്‍ ആശുപത്രിയിലും ഒരാളെ മേപ്പാടി വിംസ് മെഡിക്കല്‍ കോളജ് ആശുപത്രിയിലും പ്രവേശിപ്പിച്ചു.
കൈക്കും ചെവിക്കുമാണ് എല്ലാവര്‍ക്കും പരുക്ക്. അപ്രതീക്ഷിത പരാജയത്തിന്റെ ജാള്യത മറക്കാന്‍ എസ്.എഫ്.ഐ-ഡി.വൈ.എഫ്.ഐ സംഘം അക്രമം അഴിച്ചുവിട്ടതാണെന്ന് യു.ഡി.എസ്.എഫ് ഭാരവാഹികള്‍ ആരോപിച്ചു. സംഭവസമയത്ത് പൊലിസ് സ്ഥലത്തുണ്ടായിരുന്നെങ്കിലും നോക്കിനില്‍ക്കുകയായിരുന്നുവെന്നു നേതാക്കള്‍ ആരോപിച്ചു.
അതേസമയം, എസ്.എഫ്.ഐയുടെ വിജയത്തില്‍ വിറളിപൂണ്ട് യു.ഡി.എസ്.എഫ് പ്രവര്‍ത്തരാണ് അക്രമം അഴിച്ചുവിട്ടതെന്ന് എസ്.എഫ്.ഐ ആരോപിച്ചു.