മുതുകുളം: റിട്ട. ഹവീല്‍ദാറെ കാര്‍ തടഞ്ഞു നിര്‍ത്തി ഒരു സംഘം ആക്രമിച്ചതായി പരാതി. കണ്ടല്ലൂര്‍ തെക്ക് തിരുവാതിരയില്‍ സുരേഷിനാണ് മര്‍ദനമേറ്റത്. ചിങ്ങോലി എന്‍.ടി.പി.സി ജംങ്ഷനു സമീപം കഴിഞ്ഞ ദിവസം രാത്രിയിലാണ് സംഭവം. ഇദ്ദേഹം സഞ്ചരിച്ചിരുന്ന കാര്‍ ഒരു സംഘം ആളുകള്‍ തടഞ്ഞു നിര്‍ത്തുകയും പുറത്തിറങ്ങിയ സുരേഷിനെ മാരകായുധങ്ങള്‍ ഉപയോഗിച്ച് മര്‍ദിക്കുകയുമായിരുന്നു. കരീലക്കുളങ്ങര പൊലിസ് സ്ഥലത്ത് എത്തിയപ്പോഴേക്കും ആക്രമികള്‍ രക്ഷപെട്ടു. ഗുണ്ടാ സംഘത്തിന്റെ മര്‍ദ്ദനമേറ്റ സുരേഷ് ഹരിപ്പാട് താലൂക്ക് ആശുപത്രിയില്‍ ചികിത്സയിലാണ്.
ആക്രമണത്തില്‍ ഒരു കണ്ണിന്റെ കാഴ്ചക്കു തകരാര്‍ സംഭവിച്ച ഇദ്ദേഹത്തെ വിദഗ്ധ ചികില്‍സക്ക് ഡോക്ടര്‍മാര്‍ നിര്‍ദേശം നല്‍കി. ഭാര്യയുമായുള്ള ബന്ധം വേര്‍പെടുത്താന്‍ നിയമോപദേശം തേടി തിരികെ വരുമ്പോള്‍ നടന്ന അക്രമണമായതു കൊണ്ട് ഈ രീതിയിലും അന്വേഷണം നടക്കുന്നുണ്ട്. മുറിവേറ്റ തന്നെ ആശുപത്രിയില്‍ എത്തിക്കാനും കേസെടുക്കാനും പൊലിസ് ഉദാസീനത കാട്ടിയതായി സുരേഷ് പറഞ്ഞു.