മഞ്ചേരി: ഏറെ നാളത്തെ ഇടവേളക്കു ശേഷം പയ്യനാട് ഗ്രൗണ്ടിനെ സജീവമാക്കാന്‍ ജില്ലയിലെ മുന്‍നിര ടീമുകള്‍ ഏറ്റുമുട്ടുന്ന എ ഡിവിഷന്‍ ഫുട്‌ബോള്‍ മഞ്ചേരിയിലെത്തുന്നു. പയ്യനാട് സ്‌പോര്‍ട്‌സ് കോംപ്ലക്‌സ് സ്റ്റേഡിയത്തില്‍ അടുത്ത മാസം ആദ്യത്തിലാണ് കളി നടക്കുക. മഞ്ചേരി എവര്‍ഗ്രീന്‍ ക്ലബാണ് ടൂര്‍ണമന്റ് സംഘടിപ്പിക്കുന്നത്.
ദിവസം 1000 രൂപ വാടക നല്‍കി കരാറുറപ്പിച്ചതോടെയാണ് ടൂര്‍ണമെന്റ് നടത്താന്‍ ധാരണയായത്. തിയതി ഉടന്‍ പ്രഖ്യാപിക്കും. ഏഴു ടീമുകളുള്ള ഗ്രൂപ്പില്‍ കഴിഞ്ഞ രണ്ടുവര്‍ഷമായി മലപ്പുറം എം.എസ്.പിയാണ് ജേതാക്കള്‍. എ.എസ്.സി അരീക്കോട്, എം.ഇ.എസ് കോളജ് മമ്പാട്, ജുവനൈല്‍ എടവണ്ണ, ഫ്രന്റ്‌സ് മമ്പാട്, നിലവിലെ റണ്ണേഴ്‌സായ ബാസ്‌ക്കോ ഒതുക്കുങ്ങല്‍, എവര്‍ഗ്രീന്‍ മഞ്ചേരി തുടങ്ങിയ ടീമുകളാണ് രംഗത്തുള്ളത്. 22-28 പ്രായത്തിനിടക്കുള്ള താരങ്ങളാണ് മാറ്റുരക്കുക . മഞ്ചേരിക്ക് വേണ്ടി സന്തോഷ് ട്രോഫി താരം ഒ.കെ ജാവീദ്, ബാസ്‌ക്കോ ഒതുക്കുങ്ങലിന് മുന്‍ മുഹമ്മദന്‍സ് താരം സുബൈര്‍, മലപ്പുറം എം.എസ്.പിക്ക് വേണ്ടി സുബ്രേതോ താരങ്ങളും സീനിയര്‍ കളിക്കാരും രംഗത്തിറങ്ങും. സന്തോഷ് ട്രോഫി യോഗ്യതാ മത്സരമാണ് അവസാനമായി പയ്യനാട് സ്റ്റേഡിയത്തില്‍ നടന്നത്.