മുളങ്കുന്നത്തുകാവ്: ബാലാവകാശനിയമം നടപ്പാക്കുന്ന കാര്യത്തില്‍ കേരളമാണ് മുന്നില്‍ നില്‍ക്കുന്നതെന്ന് ജില്ലാ പഞ്ചായത്ത് പ്രസിഡന്റ് ഷീലാവിജയകുമാര്‍. ബംഗ്ലാദേശിന്റെയും യൂണിസെഫിന്റയും പുരസ്‌കാരം ലഭിച്ച കിലയെ അനുമോദിക്കാന്‍ ചേര്‍ന്ന യോഗം ഉദ്ഘാടനം ചെയ്യുകയായിരുന്നു അവര്‍.
86 ഗ്രാമപഞ്ചായത്തുകളില്‍ 60 പഞ്ചായത്തുകള്‍ സര്‍വേ പൂര്‍ത്തിയാക്കി. ശേഷിക്കുന്ന പഞ്ചായത്തുകള്‍ അടുത്ത മാസം പൂര്‍ത്തിയാക്കും. 74 അങ്കണവാടികളുടെ നിര്‍മാണവും ജില്ലയിലെ ഉടനെ പൂര്‍ത്തിയാക്കുമെന്നു ജില്ലാപ്രസിഡന്റ് പറഞ്ഞു. ബംഗ്ലാദേശില്‍ ശിശുസൗഹൃദ പഞ്ചായത്തുകള്‍ രൂപപ്പെടുത്തുന്നതിനു കില നല്‍കിവരുന്ന സേവനങ്ങളെ മാനിച്ച് ബംഗ്ലാദേശ് ഗവണ്‍മെന്റും അവിടത്തെ യൂണിസെഫ് ഘടകവും സംയുക്തമായാണ് പുരസ്‌കാരം നല്‍കിയത്. കിലയിലെ ചൈല്‍ഡ് റിസോഴ്‌സ് സെന്റര്‍ സംഘടിപ്പിച്ച അനുമോദനയോഗത്തില്‍ യൂണിസെഫ് ചെന്നൈ യൂനിറ്റിലെ ഡോ. ആര്‍.അഖില അധ്യക്ഷയായി. ആരോഗ്യസര്‍വകലാശാല വൈസ് ചാന്‍സലര്‍ ഡോ. എം.കെ.സി നായര്‍ മുഖ്യാതിഥിയായിരുന്നു. പുഴ്ക്കല്‍ ബ്ലോക്ക് പഞ്ചായത്ത് പ്രസിഡന്റ് അഡ്വ.ലൈജു.സി, മുളങ്കുന്നത്തുകാവ് ഗ്രാമപഞ്ചായത്ത് പ്രസിഡന്റ് ബിന്ദു ബെന്നി, ഉത്തര്‍ പ്രദേശിലെ അഡീഷണല്‍ പഞ്ചായത്ത് ഡയറക്ടര്‍ രാജേന്ദ്രസിങ്, പഞ്ചായത്ത് വകുപ്പിന്റെ കണ്‍സല്‍ട്ടന്റ് സുനിതസിങ്, ഡോ.പീറ്റര്‍ എം.രാജ്, ഡോ.സണ്ണി ജോര്‍ജ് എന്നിവര്‍ സംസാരിച്ചു. അനുമോദനങ്ങള്‍ക്കു കില ഡയറക്ടര്‍ ഡോ.പി.പി ബാലന്‍ നന്ദി പറഞ്ഞു.