അങ്ങാടിപ്പുറം: മേല്‍പാലത്തിനു താഴെ കഴിഞ്ഞ ദിവസം രാത്രിയോടെ രണ്ടു കടകളില്‍ മോഷണം. റെയിവേ ഗേറ്റിനു സമീപത്തെ ലൈലാക് സ്റ്റോറിലും രസിക ബേക്കറിയിലുമാണ് മോഷണം നടന്നത്. ഏകദേശം 20,000 രൂപയുടെ നഷ്ടം സംഭവിച്ചിട്ടുണ്ട്.
രണ്ടു കടകളുടെയും ഷട്ടറിലെ പൂട്ടുകള്‍ കമ്പിപ്പാരയും കട്ടറും ഉപയോഗിച്ചാണ് തകര്‍ത്തതെന്നാണ് പ്രാഥമിക നിഗമനം. സംഭവസ്ഥലത്തുനിന്നു കമ്പിപ്പാര കണ്ടെടുത്തിട്ടുണ്ട്. രാത്രി ഒന്‍പതു വരെ  കടകള്‍ തുറന്നുപ്രവര്‍ത്തിച്ചിരുന്നു.
കടയുടെ സമീപത്തെ വീടുകളിലും കവര്‍ച്ചാശ്രമം നടന്നതായി നാട്ടുകാര്‍ പറയുന്നു. വിലകൂടിയ മൊബൈല്‍ ഫോണും നിത്യോപയോഗ സാധനങ്ങളും പണവും മോഷണം പോയിട്ടുണ്ട്.
മാസങ്ങള്‍ക്കു മുന്‍പു സമീപത്തെ ഫ്‌ളാറ്റില്‍നിന്ന് ഒരു ബൈക്ക് മോഷണം പോയിരുന്നു. പാലത്തിനു താഴെ പാര്‍ക്കു ചെയ്യുന്ന മോട്ടോര്‍ ബൈക്കുകളില്‍നിന്നും കാറുകളില്‍നിന്നും വാഹനങ്ങളിലെ പാര്‍ട്‌സുകളും മോഷണംപോകുന്നുണ്ട്.